Donetsk xalq respublikasidagi Yelenovka qishlog‘ida joylashgan koloniyaga zarba berilishi oqibatida 53 kishi halok bo‘ldi, yana 130 kishi yaralandi. Bu haqda DXR hududiy mudofaa shtab-kvartirasiga tayanib, “Interfaks” xabar berdi.
DXR rasmiylarining da’vo qilishicha, zarbani Ukraina Qurolli kuchlari Amerikaning MLRS HIMARS raketa tizimlari orqali yo‘llagan. Raketa mahbuslar saqlanayotgan kazarmaga tushgan. Qurbonlar va jarohatlanganlar soni ortishi mumkin.
DXR rahbari Denis Pushilinning aytishicha, otishma paytida binoda 193 kishi bo‘lgan, bino zarar ko‘rmagan. Uning qo‘shimcha qilishicha, Yelenovkadagi tergov izolyatorida saqlanayotganlar orasida xorijliklar yo‘q.
Ukraina Qurolli kuchlari Bosh shtabi esa koloniyaga qilingan hujumda Rossiyani ayblamoqda. Bosh shtab hisobotiga ko‘ra, ukrainalik harbiy asirlar saqlanayotgan ushbu koloniyani Rossiya harbiylari artilleriyadan o‘qqa tutgan. Bayonotda zarba “maqsadli va qasddan” berilgani ta’kidlangan.
Izoh (0)