Латвия воситачи орқали Россиядан газ сотиб олишни қайта тиклади

Латвия газ-транспорт тизими оператори Latvijas gaze Россиядан табиий газ сотиб олишни қайта тиклади, деб ёзади Meduza.

Компания раҳбари Айгарс Калвитис маълум қилишича, харидлар тўғридан-тўғри «Газпром»дан эмас, балки воситачи орқали еврода амалга оширилмоқда. У етказиб берувчининг номини ошкор қилишдан бош тортди ва бу «тижорат ахбороти» эканини пеш қилди.

Украинада уруш бошлангач, Россия газини Латвияга етказиб бериш бир неча марта узиб қўйилган ва тўхтатилган, бироқ июнь ўрталаридан етказиб бериш ҳажми оша бошлаганди.

14 июль куни Латвия Сейми (парламенти) 2023 йил 1 январдан бошлаб Россиядан табиий газ олишни тўлиқ тақиқлаш ҳақида қарор қабул қилди.

1 апрелдан Россия ҳукумати «душман мамлакатлар» (Россия ҳукумати Евроиттифоқ мамлакатларининг барчасини ҳам шу тоифага киритади) газ учун ҳисоб-китобларни Россия рублида амалга оширишини талаб қилган ва акс ҳолда газ экспорти тўхтатилишини айтганди. Польша, Болгария, Финляндия ва Нидерландия Москванинг бу шартидан аллақачон бош тортган.

Эслатиб ўтамиз, «Газпром» 27 июль, чоршанба кунидан бошлаб «Шимолий оқим» қувури орқали газ етказиб бериш қувватини 20 фоизидан кўп бўлмаган даражага қисқартирди. Газ ҳажми кунига 33 миллион куб метрдан кўп бўлмаган миқдорда, умумий 167 миллион кубометрни ташкил қилади.