Shimoliy va Janubiy Amerika mamlakatlari mudofaa vazirlarining 15-konferensiyasi (CMDA) yakunlari bo‘yicha davlatlar vakillari Ukrainadagi mojaroni tinch yo‘l bilan hal qilishga chaqiruvchi deklaratsiyani imzoladi. Bu haqda Correio Braziliense xabar berdi.
Konferensiyasida 21 davlat, jumladan AQSH, Kanada, Braziliya, Kolumbiya, Meksika, Argentina, Chili va boshqalar ishtirok etdi. Barcha ishtirokchilar yakuniy hujjatga imzo chekdi, ammo hujjatdagi ba’zi jumlalar kelishmovchiliklarga sabab bo‘ldi.
Jumladan, deklaratsiyada Ukrainadagi mojaro “noqonuniy, asossiz va provokatsiya yo‘li bilan qo‘zg‘atilgan” deb topilishi haqidagi qoida mavjud edi. CNN Brasil yozishicha, bunday pozitsiyani, masalan, AQSH, Kanada, Paragvay yoqlagan; biroq Argentina va Braziliya buni qo‘llab-quvvatlamagan. Ular mojaroni baholashda Birlashgan Millatlar Tashkilotining rolini tan olishini hamda inqirozni hal qilish uchun ushbu tashkilotni eng munosib, deb bilishini ta’kidlagan. Meksika esa vazirlarning bunday pozitsiyasi CMDA doirasiga kirmaydi, deb hisoblamoqda.
Mart oyi boshida BMT Bosh Assambleyasi Rossiyadan “Ukrainaga qarshi kuch ishlatish”ni zudlik bilan to‘xtatishni va qurolli kuchlarini mamlakat hududidan butunlay olib chiqib ketishni so‘ragan edi. Tegishli rezolyutsiyaga faqat Belarus, Shimoliy Koreya, Eritreya, Rossiya va Suriya qarshi ovoz bergan.
Izoh (0)