Krishtianu Ronaldu “Manchester Yunayted”dan ketmoqchi ekanligini jamoa bosh murabbiyiga aytmagan

Krishtianu Ronalduning xatti-harakatlari “Manchester Yunayted”dagi barchani hayratda qoldirmoqda.

The Athletic nashrining “Manchester Yunayted”ga yaqin manbasiga tayanib xabar berishicha, klub Ronaldu ketish istagini bildirish uchun tanlagan vaqtni “shok” deb atagan.

Portugaliyalik qarorini 2-iyul, shanba oqshomida ma’lum qilgan, dushanba kuni esa “Manchester Yunayted” mavsumoldi mashg‘ulotlarini boshlashi kerak edi. O‘sha kuni Erik ten Hag jamoa a’zolariga Ronaldu oilaviy muammolar tufayli mashg‘ulotlarga kelmaganini tushuntirgan.

Ten Hag ham boshqalar kabi bu vaziyatdan hayratga tushgan. Qolaversa, “Manchester Yunayted”ning yangi bosh murabbiyi Ronalduning ketish niyatida ekanini bevosita futbolchining o‘zidan eshitmagan. Shunga qaramay niderlandiyalik mutaxassis Ronalduning “Manchester Yunayted”ga mashg‘ulotlariga vaqtida yetib kelishiga ishongan.