Niderlandiya parlamenti uydan ishlash haqidagi qonunni ma’qulladi. Bunga butun Yevropa ergashishi mumkin

Niderlandiya parlamenti ko‘plab korxonalar xodimlariga uydan ishlash huquqini beruvchi qonunni ma’qulladi, deb yozadi BBC Russia. Bu butun Yevropa bo‘ylab mehnat qonunchiligida inqilob keltirib chiqarishi istisno qilinmayapti.

Agar senat ham parlament fikriga qo‘shilsa, Niderlandiya masofadan ishlashni qonuniylashtirishda peshqadamlik qilgan bo‘ladi, uning afzalliklari esa koronavirus pandemiyasi davrida butun dunyo bo‘ylab ko‘plab ishchilar tomonidan yuqori baholangan edi.

Huquqshunoslar fikricha, unda Niderlandiyadan, katta ehtimol bilan, qo‘shni mamlakatlar ham o‘rnak oladi, demak butun Yevropa bo‘yicha mehnat qonunchiligi tubdan o‘zgaradi.

Masofadan ishlash haqidagi qonun lotihasi D-66 yevropaparast partiyasi vakili Stiven Van Veyenberg va Yashillar partiyasidan Senna Maatug tomonidan parlamentga ko‘rib chiqish uchun kiritildi.

Unga muvofiq, xodimlar, agar ularning faoliyat turi bunga imkon bersa, ish beruvchiga uydan ishlash haqidagi iltimos bilan murojaat qilishi mumkin, ish beruvchi esa bu iltimosni ko‘rib chiqishi shart bo‘ladi.

Dunyo kompaniyalarining ba’zilari o‘z tashabbusi bilan xodimlarini gibrid grafikka o‘tkazib bo‘lgan, bu ularga haftaning bir qismida uydan ishlash imkonini beradi. Masalan, o‘tgan yili yozda Shveysariyaning UBS bankidagi 73 ming xodim shunday imkoniyatni qo‘lga kiritgan edi. Shu hafta uning Londondagi flagman ofisi ishlash maydoniga ehtiyoj keskin qisqargani tufayli ikkita qavatni ijaraga berishini e’lon qildi.

Shu yilning aprelida Fransiyadagi eng yirik BNP Paribas banki o‘zining 132 ming xodimiga kamida 2024-yilgacha ishni ofisda va uyda bajarish o‘rtasida teng bo‘lib olishga ruxsat berdi.

Iyun boshida Ilon Mask Tesla avtomobil kompaniyasi xodimlaridan to‘liq ofisga kelib ishlashni talab qilganida esa, Germaniyaning IG Metall eng yirik kasaba uyushmasi tadbirkorning talabiga bo‘ysunishni istamagan har qanday kishini qo‘llab-quvvatlashini ma’lum qildi.

Germaniya hukumati ham uydan ishlash huquqini qonunan belgilab qo‘yish rejalarini ma’lum qilgandi. Yanvarda mehnat vaziri Xubertus Xayl pandemiya ish beruvchilarni moslashuvchan bo‘lishga undaganini va hukumat “Germaniyada harakatchan ish uchun zamonaviy qoidalar” yaratishda bundan foydalanishni rejalashtirayotganini aytgandi. Xayl o‘shanda jamoatchilikni bunga mo‘ljallangan yangi normativ-huquqiy baza tez orada paydo bo‘lishiga ishontirgan edi.

“Butun dunyo bo‘ylab qonun chiqaruvchilar Niderlandiyadagi qonunni diqqat bilan kuzatishga qaror qilishi va o‘z mamlakatlarida shunday me’yorlar kiritish imkoniyati haqida o‘ylab qolishiga shubham yo‘q”, — dedi Vinson and Elkins kompaniyasi huquqshunosi Martin Laff.

BBC qayd etishicha, uydan ishlash — turli mamlakatlarda ish beruvchilar va hukumatlar xodimlarning ish va shaxsiy hayot o‘rtasidagi muvozanatni yaxshilash uchun ko‘rib chiqishga qaror qilgan yagona usul emas.

Chunonchi, Britaniyada yarim yillik tajriba doirasida 70 ta kompaniya o‘z xodimlariga to‘liq ish haqi saqlanib qolgan holda haftada to‘rt kun ishlash imkoniyatini taqdim etdi.

Bunday tajriba avvalroq Islandiyada bir necha yillar davomida o‘tkazilgan va muvaffaqiyatli natija bergan edi.