AQSHda afroamerikalik Jorj Floydni o‘ldirgan sobiq politsiyachi yana 20 yilga qamoqqa hukm qilindi

2020-yilning mayida afroamerikalik Jorj Floydni o‘ldirganlik uchun o‘tgan yili 22,5 yilga qamoqqa hukm qilingan sobiq politsiyachi Derek Shovin Floydning fuqarolik huquqlarini buzish haqidagi alohida ayblov bo‘yicha yana 20 yilga ozodlikdan mahrum qilindi, deb yozadi “RBK”.

Politsiyachi afroamerikalikni 2020-yilning may oyida hibsga olish chog‘ida o‘ldirgandi. Qo‘lga olish paytida Derek Shovin tizzasi bilan Floydning bo‘ynini bosib, sakkiz daqiqacha shu holatda turgan, afroamerikalik nafas ololmayotgani haqida bir necha marta aytgani kor qilmagan.

Buning ortidan mamlakat bo‘ylab huquq-tartibot organlari shafqatsizligi va irqiy tengsizlikka qarshi ommaviy norozilik namoyishlari avj oldi va Black Lives Matter (“Qora tanlilarning hayoti muhim”) harakati paydo bo‘ldi.

Sobiq politsiyachining sud jarayoni mart oyining oxirida boshlandi. Aprel oyida hakamlar hay’ati Shovinni uchta band bo‘yicha aybdor deb topdi: qasddan sodir etilmagan ikkinchi darajali qotillik (og‘irlashtiruvchi holatlarsiz), ehtiyotsizlikdan odam o‘ldirish va inson hayotiga nisbatan bexosdan o‘limga olib keladigan qo‘pol hurmatsizlik.

Prokuratura Shovinni 30 yilga ozodlikdan mahrum qilishni so‘ragan, ular Floydni hibsga olishda politsiyachi tomonidan qo‘llanilgan usul o‘limga olib kelganini ta’kidladi. Advokatlar, o‘z navbatida, Floyd politsiyachining xatti-harakati tufayli emas, balki sog‘lig‘i va giyohvand moddalarni iste’mol qilgani sababli vafot etganini da’vo qildi.

Shovin Floydga shunday munosabatda bo‘lgani va uning yordam haqidagi iltimoslarini e’tiborsiz qoldirganini sud Floydning fuqarolik huquqlari buzilishi deb topdi. Shovin erkakning shikoyatlarini eshitganini, ammo baribir uni qo‘yib yubormaganini, keyin esa unga yordam berilishiga xalaqit qilganini tan oldi. Sobiq politsiyachi o‘z xatti-harakatlari “noto‘g‘ri” bo‘lganiga qo‘shildi. Ayni vaqtda sud chog‘ida Shovin qilmishiga pushaymon bo‘lmadi va marhumning oilasidan uzr so‘ramadi.

Floydni o‘ldirganlik uchun qamoq muddatini Shovin shtat darajasidagi ish bo‘yicha, huquqlarni buzganlik uchun qamoq muddatini esa — federal darajadagi ish bo‘yicha oldi. Prokuratura unga qamoq muddatlarini bir vaqtning o‘zida o‘tashga ruxsat berdi.

Shovindan tashqari, Floydning fuqarolik huquqlarining buzilishi haqidagi ish bo‘yicha afroamerikalikning o‘limi yuz bergan joyda bo‘lgan yana uch nafar politsiyachi sudlanmoqda. Sud maslahatchilari ularni aybdor deb topdi, hozir ular hukm chiqarilishini kutmoqda.