Qozog‘iston prezidenti Qosim-Jo‘mart To‘qayevning matbuot kotibi Ruslan Jeldibay ma’lum qilishicha, Rossiya Qozog‘istonning strategik sherigi va ittifoqdoshi bo‘lib kelgan va shunday bo‘lib qoladi. Bu haqda “Kommersant” xabar berdi.
Matbuot kotibining bayonoti davlat rahbari tomonidan Qozog‘istonning tranzit salohiyatini rivojlantirish bo‘yicha o‘tkazilgan yig‘ilish yuzasidan izoh doirasida yangradi. Prezident vakili ta’kidlashicha, Qozog‘iston Rossiya manfaatlariga zarar yetkazadigan xatti-harakatlarga yo‘l qo‘ymaydi.
“Uning (Rossiyaning) manfaatlariga zarar yetkazadigan hech qanday harakatlarga yo‘l qo‘yilmaydi. Qozog‘istonga nisbatan ham shunday harakatlar amalga oshirilmaydi, deb umid qilamiz”, — deb yozdi Jeldibay Facebook’da. Uning ta’kidlashicha, Rossiya Qozog‘istonning strategik sherigi va ittifoqdoshi bo‘lib kelgan va shunday bo‘lib qoladi. Shu tariqa Ruslan Jeldibay jurnalistlarning Qozog‘iston prezidenti tomonidan transport-tranzit salohiyatini oshirish bo‘yicha yig‘ilish borasidagi savollariga javob berdi.
“Gap birinchi navbatda Qozog‘iston uglevodorodlarini geosiyosiy beqarorlik sharoitida xalqaro bozorlarga yetkazib berish yo‘nalishlarini diversifikatsiyalash haqida bormoqda. Yig‘ilishda pragmatizm ruhida yangi transport yo‘laklarini qurish muhokama qilindi”, — deya aniqlik kiritdi prezident matbuot kotibi. Jeldibayning aytishicha, gap uzoq muddatli rejalar haqida bormoqda, qabul qilingan qarorlar esa siyosiy motivlarga ega emas.
Avvalroq rossiyalik eksportchilarning Qozog‘istonda neft tortib chiqarishni to‘xtatib qo‘yishi xavfi fonida To‘qayev “Kazmunaygaz”ga yuklarni dengiz orqali tashishni rivojlantirishni topshirgan edi. Yetkazib berishlarni Rossiyani aylanib o‘tgan holda amalga oshirish ko‘zda tutilmoqda. Davlat rahabri fikricha, hukumat Qozog‘iston portlarini transformatsiya qilishi va ularni “Kaspiy dengizining yetakchi xablaridan biri”ga aylantirishi kerak. Bungacha Qozog‘iston Moliya vazirligi de-fakto Rossiyaga sanksiyalar tufayli tovarlarning alohida turlarini yetkazib berishni cheklaydigan farmon loyihasini muhokama uchun e’lon qilgan edi.
To‘qayevning bayonoti Rossiya sudi Kaspiy quvur konsorsiumining dengiz terminali ishini 30 kunga to‘xtatish haqidagi qaroridan bir kun o‘tib yangradi. Bu 2022-yilda uchinchi marta Qozog‘iston neftining Rossiya orqali jahon bozoriga chiqarilishini to‘xtatib qo‘yishi mumkin.
Avvalroq Qosim-Jo‘mart To‘qayev Yevropa Ittifoqiga Rossiya neftini Qozog‘iston neftiga almashtirishni taklif qilgan edi. Prezident, shuningdek, Yevropa Ittifoqini muqobil transkontinental yo‘laklarni, jumladan, Transkaspiy xalqaro transport yo‘nalishini rivojlantirishda hamkorlik qilishga chaqirgan. U Qozog‘iston jahon va Yevropa bozorlaridagi vaziyatni barqarorlashtirish uchun o‘zining uglevodorod salohiyatidan foydalanishga tayyorligini ma’lum qilgan.
Mavzuga doir: To‘qayev Putinning yonida DXR va LXRni kvazi-davlat hududlari deb atadi
Izoh (0)