Нидерландия парламенти уйдан ишлаш ҳақидаги қонунни маъқуллади. Бунга бутун Европа эргашиши мумкин

Нидерландия парламенти кўплаб корхоналар ходимларига уйдан ишлаш ҳуқуқини берувчи қонунни маъқуллади, деб ёзади BBC Russia. Бу бутун Европа бўйлаб меҳнат қонунчилигида инқилоб келтириб чиқариши истисно қилинмаяпти.

Агар сенат ҳам парламент фикрига қўшилса, Нидерландия масофадан ишлашни қонунийлаштиришда пешқадамлик қилган бўлади, унинг афзалликлари эса коронавирус пандемияси даврида бутун дунё бўйлаб кўплаб ишчилар томонидан юқори баҳоланган эди.

Ҳуқуқшунослар фикрича, унда Нидерландиядан, катта эҳтимол билан, қўшни мамлакатлар ҳам ўрнак олади, демак бутун Европа бўйича меҳнат қонунчилиги тубдан ўзгаради.

Масофадан ишлаш ҳақидаги қонун лотиҳаси D-66 европапараст партияси вакили Стивен Ван Веенберг ва Яшиллар партиясидан Сенна Маатуг томонидан парламентга кўриб чиқиш учун киритилди.

Унга мувофиқ, ходимлар, агар уларнинг фаолият тури бунга имкон берса, иш берувчига уйдан ишлаш ҳақидаги илтимос билан мурожаат қилиши мумкин, иш берувчи эса бу илтимосни кўриб чиқиши шарт бўлади.

Дунё компанияларининг баъзилари ўз ташаббуси билан ходимларини гибрид графикка ўтказиб бўлган, бу уларга ҳафтанинг бир қисмида уйдан ишлаш имконини беради. Масалан, ўтган йили ёзда Швейцариянинг UBS банкидаги 73 минг ходим шундай имкониятни қўлга киритган эди. Шу ҳафта унинг Лондондаги флагман офиси ишлаш майдонига эҳтиёж кескин қисқаргани туфайли иккита қаватни ижарага беришини эълон қилди.

Шу йилнинг апрелида Франциядаги энг йирик BNP Paribas банки ўзининг 132 минг ходимига камида 2024 йилгача ишни офисда ва уйда бажариш ўртасида тенг бўлиб олишга рухсат берди.

Июнь бошида Илон Маск Tesla автомобиль компанияси ходимларидан тўлиқ офисга келиб ишлашни талаб қилганида эса, Германиянинг IG Metall энг йирик касаба уюшмаси тадбиркорнинг талабига бўйсунишни истамаган ҳар қандай кишини қўллаб-қувватлашини маълум қилди.

Германия ҳукумати ҳам уйдан ишлаш ҳуқуқини қонунан белгилаб қўйиш режаларини маълум қилганди. Январда меҳнат вазири Хубертус Хайль пандемия иш берувчиларни мослашувчан бўлишга ундаганини ва ҳукумат «Германияда ҳаракатчан иш учун замонавий қоидалар» яратишда бундан фойдаланишни режалаштираётганини айтганди. Хайль ўшанда жамоатчиликни бунга мўлжалланган янги норматив-ҳуқуқий база тез орада пайдо бўлишига ишонтирган эди.

«Бутун дунё бўйлаб қонун чиқарувчилар Нидерландиядаги қонунни диққат билан кузатишга қарор қилиши ва ўз мамлакатларида шундай меъёрлар киритиш имконияти ҳақида ўйлаб қолишига шубҳам йўқ», — деди Vinson and Elkins компанияси ҳуқуқшуноси Мартин Лафф.

BBC қайд этишича, уйдан ишлаш — турли мамлакатларда иш берувчилар ва ҳукуматлар ходимларнинг иш ва шахсий ҳаёт ўртасидаги мувозанатни яхшилаш учун кўриб чиқишга қарор қилган ягона усул эмас.

Чунончи, Британияда ярим йиллик тажриба доирасида 70 та компания ўз ходимларига тўлиқ иш ҳақи сақланиб қолган ҳолда ҳафтада тўрт кун ишлаш имкониятини тақдим этди.

Бундай тажриба аввалроқ Исландияда бир неча йиллар давомида ўтказилган ва муваффақиятли натижа берган эди.