“Qoraqalpoq xalqining tabiatiga mos kelmaydigan hodisa”. Zoir Mirzayev Nukusdagi tartibsizliklarga munosabat bildirdi

Toshkent viloyati hokimi Zoir Mirzayev Nukusda yuz bergan tartibsizliklarga munosabat bildirib, “qoraqalpoq xalqining baxti va farovonligi butun o‘zbek xalqining baxti va farovonligi” ekanini aytdi.

Qoraqalpog‘istonda men bormagan tuman, ovul qolmagan, hammasiga borib, aholi bilan gaplashib, choy ichib, bir dasturxon atrofida o‘tirganman. Ulardagi bag‘rikenglik, og‘ir iqlim sharoitiga qaramasdan, mardonavor hayot kechirayotganiga tan berganman. Hozirgi holatlar qoraqalpoq xalqining qoniga ham, kelib chiqishi, tarixiga ham, umuman, tabiatiga to‘g‘ri kelmaydi.

Biz o‘z taqdirimiz va kelajagimizni yagona davlat, yagona xalq o‘laroq bir tan-u bir jon bo‘lib yashab kelgan Qoraqalpog‘iston va uning azm-u shijoatli, mard va oliyjanob xalqi bilan birga ko‘ramiz.

Shunday ekan, bo‘lib o‘tgan voqealarga shu yurt, shu xalqning ertasi va kelajagiga befarq bo‘lmagan har bir uyg‘oq vijdonli zamondoshimiz o‘z munosabatini bildirishi lozim. Toki, barchamiz hodisalardan kerakli saboq va xulosalarni chiqarib, tinchlik qanday betimsol ne’mat ekanini avvalo o‘zimiz anglashimiz va jamoamiz, oilamiz, umuman, atrofimizdagilarga yetkaza olishimiz shart va zarurdir, — degan u viloyat faollari bilan yig‘ilishda.