O‘zbekistonda urbanizatsiya (shaharlashuv) rivojlansa, uylarni isitish juda arzonga tushadi. Bu haqda Energetika vazirligi elektr energetikasi tarmog‘ini isloh qilish loyihasi direktori o‘rinbosari Bahrombek Umarbekov ma’lum qildi, deya xabar bermoqda “Daryo” muxbiri.
Bahrombek Umarbekov Toshkent shahrida o‘tkazilgan energetika forumi doirasida jurnalistlarga bergan intervyusida urbanizatsiyaning energetika sohasiga ta’siri haqida gapirdi.
“Obod qishloq” dasturi natijasida qishloqlar kengayib ketdi. Urbanizatsiya o‘smadi, yaxshi bo‘lmadi. Urbanizatsiyaga energetika nuqtayi nazaridan qaralsa, odamlar jipsroq shaharlarda yashasa, markaziy isitish tizimlariga ulanadi. Shunda bu tizimdagi bug‘ tekinga tushadi. Chunki elektr ishlab chiqarilganda, bug‘ o‘zi shundoq ham chiqadigan narsa. Bug‘ tekinga tushgani uchun uyni isitish ham juda arzon bo‘ladi. Natijada shaharlarni isitish ancha arzonga tushadi. Urbanizatsiyani yo‘lga qo‘ysak ko‘mirda uyini isituvchi xonadonlar soni ancha kamayadi. Undan keyin rivojlanishlarimiz yaxshi bo‘lib ketsa, hozir uyni isitish bo‘yicha yangi texnologiyalar chiqyapti. Ular ko‘mirsiz va gazsiz ham uyni isita oladi. shulardan foydalanish asta-sekin yo‘lga qo‘yiladi. Urbanizatsiya strategiyasini ishlab qichishga Iqtisodiy taraqqiyot va kambag‘allikka qarshi kurashish vazirligi mas’ul”, – dedi u.
Avvalroq Bahrombek Umarbekov “o‘zbeklarning puliga muhtoj emasmiz, pul more”, degan so‘zlariga izoh bergandi.
Izoh (0)