Shavkat Mirziyoyev 4-iyul kuni Yevropa kengashi prezidenti Sharl Mishel bilan telefon orqali muloqot qildi. Bu haqda Prezident matbuot xizmati xabar qildi.
Qayd etilishicha, O‘zbekiston va Yevropa Ittifoqi o‘rtasidagi ko‘p qirrali va o‘zaro manfaatli hamkorlikni kengaytirish masalalari ko‘rib chiqilgan. Suhbat avvalida davlat rahbari O‘zbekistonda demokratik va ijtimoiy-iqtisodiy yangilanishlarni amalga oshirishga ko‘rsatilayotgan har tomonlama ko‘mak uchun minnatdorlik bildirgan. Yevrokengash prezidenti, o‘z navbatida, O‘zbekistonning kuchli fuqarolik jamiyati va huquqiy davlat qurish borasidagi sa’y-harakatlarini qo‘llab-quvvatlagan.
Qoraqalpog‘istondagi vaziyatning ba’zi buzg‘unchi kuchlar tomonidan izdan chiqarilishiga yo‘l qo‘yib bo‘lmasligi alohida qayd etilgan. Sharl Mishel jinoiy unsurlar tomonidan uyushtirilgan tartibsizliklar oqibatida qurbon bo‘lganlarning oilalari va yaqinlariga hamdardlik so‘zlarini yetkazishni so‘ragan.
Suhbat chog‘ida O‘zbekiston va YI o‘rtasida Kengaytirilgan sheriklik va hamkorlik to‘g‘risidagi bitimning tayyorlanishini yakuniga yetkazish masalasiga e’tibor qaratilgan. “Preferensiyalar bosh tizimi plyus” afzalliklaridan foydalangan holda o‘zaro savdo va investitsiyalarni ko‘paytirish muhimligi ta’kidlangan. Tomonlar amaliy hamkorlikning aniq dastur va loyihalarini, “yashil iqtisodiyot”, raqamlashtirish, innovatsiyalar, logistika, qishloq xo‘jaligi, ekologiya, ta’lim va sog‘liqni saqlash sohalarida ilgari surish masalalariga to‘xtalgan.
Markaziy Osiyo mintaqasida yuzaga kelayotgan vaziyat hamda YI tuzilmalari bilan ko‘p tomonlama muloqotning darajasini oshirish yuzasidan fikr almashilgan. O‘zaro bog‘liqlikni kuchaytirish, shuningdek, mintaqada xavfsizlik va barqarorlikni ta’minlash, shu jumladan, Afg‘onistonda mustahkam tinchlik qaror topishiga ko‘maklashish va uning xalqiga qo‘ldan kelgancha yordam ko‘rsatishga qaratilgan yirik xalqaro tadbirlarni O‘zbekistonda tashkil etish masalasi qo‘llab-quvvatlangan.
Bundan tashqari, Yevropa Ittifoqi matbuot kotibi O‘zbekistonda yuz bergan so'nggi voqealar bo‘yicha bayonot berdi.
“Yevropa Ittifoqi Qoraqalpog‘istonda O‘zbekiston Konstitutsiyasiga taklif etilayotgan tuzatishlar e’lon qilinganidan keyin sodir bo‘lgan zo‘ravonlik voqealarini ochiq va mustaqil tergov qilishga chaqiradi. Biz qurbonlar borligidan chuqur afsusdamiz va voqealar rivojini diqqat bilan kuzatishda davom etamiz.
Prezident Mirziyoyev tomonidan taklif etilayotgan Konstitutsiyaga o‘zgartirishlar kiritish yuzasidan jamoatchilikning xavotirlariga tezkorlik bilan munosabat bildirish bo‘yicha ko‘rilgan choralarni e’tirof etamiz. Biz barcha tomonlarni kuch ishlatish yoki zo‘ravonliklarni davom ettirishning oldini olish maqsadida o‘z harakatlarida vazminlik ko‘rsatishga chaqiramiz. Yevropa Ittifoqi rasmiylarni O‘zbekistonning xalqaro majburiyatlariga muvofiq inson huquqlari, jumladan, so‘z erkinligi va yig‘ilishlar erkinligi kabi asosiy huquqlarni kafolatlashga chaqiradi.
Yevropa Ittifoqi O‘zbekiston bilan mustahkam va rivojlanib borayotgan hamkorlikka ega. Biz mamlakatda olib borilayotgan sa’y-harakatlarini qo‘llab-quvvatlash tarafdorimiz va uni xalqaro normalar hamda ilg‘or tajribalar asosida fuqarolar, manfaatdor tomonlar bilan maslahatlashgan holda ushbu jarayonni davom ettirishga chaqiramiz”, — deyiladi xabarda.
Izoh (0)