Lisichanskda ko‘tarilayotgan Rossiya bayroqlari, Belgorod va Slavyanskdagi vayronalar. Urushning 130-kunidan fotoreportaj
3-iyul kuni Rossiyaning Belgorod shahrida qator portlashlar sodir bo‘ldi. Rossiya Mudofaa vazirligi shaharga hujumda Ukraina askarlarini aybladi. Agentlik ma’lumotlariga ko‘ra, to‘rt kishi halok bo‘lgan: bir nafar Rossiya fuqarosi, uch nafar Ukraina fuqarosi. Lisichansk butunlay rus qo‘shinlari nazoratiga o‘tdi, Lisichanskdan 20 kilometr uzoqlikda joylashgan Seversk uchun janglar boshlandi. Donetsk viloyatining Slavyansk shahri meri Vadim Lyax shahar “so‘nggi paytlardagi keng ko‘lamda” o‘qqa tutilayotgani haqida gapirdi: olti kishi halok bo‘lgan, ulardan biri yosh bola. Vladimir Putinning matbuot kotibi Dmitriy Peskovning aytishicha, hozirgi bosqichda Kreml Ukraina bilan tinchlik muzokaralari uchun hech qanday istiqbol ko‘rmayapti. Meduza urushning 130-kuniga oid asosiy suratlarni jamladi.
Belgorod
Belgoroddagi Mayakovskiy ko‘chasi yaqinida aviazarbadan vayron bo‘lgan bino yonida aholi va o‘t o‘chirish mashinasi. Rossiya Mudofaa vazirligi ma’lumotlariga ko‘ra, Ukraina qo‘shinlari “Tochka-U” ballistik raketalaridan kassetali o‘q-dorilar bilan Belgorodning turar joylariga zarba bergan. Havo hujumidan mudofaa tizimlari uchta raketani ham urib tushirgan, ammo ulardan birining qismlari Belgorodga qulagan. To‘rt kishi halok bo‘ldi.Foto: “Kommersant”
Belgorodda raketa hujumidan vayron bo‘lgan turar joy binosidagi kvartira. Viloyat gubernatori Vyacheslav Gladkov Ukraina qo‘shinlarining hujumi oqibatida 21 ta ko‘p qavatli uy va 40 ta xususiy turar joy binosiga zarar yetganini da’vo qilmoqda.Foto: Anadolu
Belgorod aholisi raketa hujumidan keyin vayronalarni tozalamoqda.Foto: “Kommersant”
Qutqaruvchilar vayronalar joyida ish olib bormoqda.Foto: Anadolu
Donbass shimoli
HIMARS raketa tizimi ustida turgan Ukraina askari. 1-iyul kuni Qo‘shma Shtatlar Ukrainaga harbiy yordamning yangi paketini e’lon qildi, bu ilgari yetkazilgan bir nechta raketa tizimlari uchun o‘q-dorilarni ham o‘z ichiga oladi.Foto: Getty Images
Lisichanskdagi o‘qqa tutilib vayron bo‘lgan Ta’lim va fan vazirligi binosiga kirayotgan rossiyalik askar. 3-iyul kuni kechqurun Ukraina Qurolli kuchlari Bosh shtabi ukrainalik harbiylar shaharni tark etganini tasdiqladi.Foto: “TASS”
LXR “Xalq militsiyasi” vakili Ivan Filiponenko (chapda) Lisichanskdagi shahar kasalxonasi binosi ustida Rossiya bayrog‘i va G‘alaba bayrog‘ini ko‘tarmoqda. Shaharda faol janglar 25-iyundan 3-iyulgacha davom etdi, ikkala tomon ham Lisichansk rus qo‘shinlari nazoratiga o‘tganini tasdiqladi.Foto: “TASS”
Lisichanskdagi shahar kasalxonasi tashqarisida bir quchoq o‘tin ko‘targan ayol. Lisichansk Lugansk viloyatidagi Ukraina Qurolli Kuchlari nazoratida bo‘lgan so‘nggi shaharlardan biri edi. Aprel oyining oxiridan beri shaharda gaz, suv va elektr ta’minoti yo‘q.Foto: “TASS”
3-iyul kuni Rossiya aviazarbalaridan so‘ng Slavyansk savdo mavzeida hosil bo‘lgan vayronagarchilik. Hudud rahbari Pavel Kirilenkoning so‘zlariga ko‘ra, olti kishi halok bo‘lgan, ulardan biri yosh bola.Foto: Getty Images
Rossiya qo‘shinlarining raketa hujumidan keyingi yong‘in. Ukraina ommaviy axborot vositalarining yozishicha, 40 ga yaqin uy, bozor, bog‘cha va suv ta’minoti tizimi vayron bo‘lgan yoki shikastlangan.Foto: Getty Images
71 yoshli Vladimir Vasilevich qarindoshlarining hovlisida. Hovli 3-iyul kuni Slavyankaga qilingan raketa hujumidan vayron bo‘lgan.Foto: Scanpix
Gumanitar yordam qutilarini olib ketayotgan seversklik o‘smirlar. LXR ushbu shahar uchun kurash boshlanganini e’lon qilgan. Foto: AFP
Mariupol
Rossiya Favqulodda vaziyatlar vazirligi mutaxassislari va g‘avvoslar “Azovstal” zavodi yaqinidagi daryoni tozalamoqda. Mariupol 20-may kuni rus qo‘shinlari nazoratiga o‘tdi. “Azovstal” shahardagi oxirgi qarshilik markazi bo‘ldi.Foto: AFP
Izoh (0)