Rossiyaning Ukrainadagi maxsus operatsiyasi qancha davom etishini hech kim bilmaydi, ammo Rossiya hukumati uni olib borish uchun juda katta resurslarga ega. Bu haqda Germaniya kansleri Olaf Shols ma’lum qildi, deb yozadi “RBK”.
Kanslerdan Rossiya operatsiyasi “yillab” davom etishi mumkinmi? — deb so‘rashdi. “Aslida buni hech kim bilmaydi”, — deya javob berdi Shols.
“U [Rossiya prezidenti Vladimir Putin] — ko‘p odamlar yashaydigan, resurslari katta bo‘lgan juda buyuk mamlakat yetakchisi, shunday ekan, u haqiqatan ham uzoq vaqt davom ettirishi mumkin”, — deya qo‘shib qo‘ydi Germaniya kansleri.
Shuningdek, intervyu chog‘ida Sholsdan Vladimir Putin “Ukrainada qo‘nim topadi” deb ishonasizmi? — deb so‘rashdi. “O‘ylaymanki, biz qilayotgan hamma narsalar unga bu ish bermasligi va u muvaffaqiyatga erisha olmasligini tushunishda yordam beradi”, — dedi kansler bunga javoban.
Mart boshida Rossiya mudofaa vaziri Sergey Shoygu Ukrainadagi operatsiya belgilangan maqsadlarga erishilguniga qadar davom etishini ta’kidlagandi. 24-fevral kuni operatsiya boshlanganini e’lon qilayotib, Putin uning maqsadlari Ukrainani “demilitarizatsiya va denatsifikatsiya qilish” (qurolsizlantirish va natsizmga qarshi kurashish), shuningdek, Donbass aholisini, go‘yoki Kiyev hukumati tomonidan olib borilayotgan, “genotsid”dan himoya qilish ekanini aytgandi.
Aprel boshida Rossiya prezidenti vakili Dmitriy Peskov operatsiya “yaqin kelajakda” yakunlanishiga umid bildirgandi.
Ukraina prezidenti Vladimir Zelenskiy, o‘z navbatida, nizo yil oxirigacha, qish boshlangunicha tugaydi, deb umid qilyapti. Kreml agar Kiyev harbiylariga qurollarni tushirish buyrug‘ini berib, Moskvaning shartlarini bajarsa, jangovar harakatlar bir kundayoq tugashiga erishishi mumkinligini ma’lum qildi.
Izoh (0)