Turkiyada mehnatga haq to‘lashning eng kam miqdori 5 500 liragacha oshirildi. Bu yuqori inflyatsiyaning ta’siri

Turkiyada oxirgi olti oy ichida ikkinchi marta mehnatga haq to‘lashning eng kam miqdori (MHTEKM) oshirildi. Bu haqda Financial Times xabar bermoqda.

Endi Turkiyada MHTEKM 5500 lirani (taxminan 328 dollar yoki 3,5 million so‘m) tashkil etadi. Taqqoslash uchun, avval 4250 lira (taxminan 254 dollar yoki 2,7 million so‘m) edi.

Rasmiy darajada miqdor 74 dollarga oshgan, biroq yil boshidan buyon lira 20 foizga qadrsizlangani sababli, asl o‘sish atigi 9 dollarni tashkil qildi.

Turkiya mehnatga haq to‘lashning eng kam miqdorini qiyin iqtisodiy vaziyat tufayli oshirmoqda, deb tushuntiradi Bloomberg. Mamlakatda yillik inflyatsiya 80 foizga yaqinlashdi.

Taqqoslash uchun, O‘zbekistonda yillik inflyatsiya 12 foizni tashkil etadi va bu yuqori ko‘rsatkich sanaladi.

Ko‘pchilik ekspertlar Turkiyaga asosiy stavkani oshirishni tavsiya qiladi, biroq mamlakat prezidenti Rajab Toyyib Erdo‘g‘on bunga qarshi turibdi.

Erdo‘g‘an kelasi yil boshida inflyatsiya “oqilona darajaga” tushishini kutmoqda va fuqarolardan sabrli bo‘lishni so‘ramoqda.

Avvalroq Turkiyaning savdo taqchilligi rekord darajaga yetgani haqida xabar berilgan edi.