Birlashgan Millatlar Tashkiloti Inson huquqlari bo‘yicha boshqarmasining monitoring missiyasi 29-iyun kuni Ukrainadagi urush paytida inson huquqlarining buzilishi haqida hisobot e’lon qildi.
Hisobot 2022-yil 24-fevraldan 15-maygacha to‘plangan ma’lumotlarni aks ettiradi.
Bu davrda, xususan, kuzatuv missiyasi a’zolari rossiyalik harbiylar tomonidan harbiy harakatlardan tashqari sodir etilgan 300 dan ortiq tinch aholining o‘ldirilishi to‘g‘risidagi ma’lumotlarga ega bo‘ldi. Gap, boshqa narsalar qatorida, qochishga urinayotgan fuqarolik avtomashinalarining o‘qqa tutilishi va Ukraina Qurolli Kuchlarida ishlaganlikda gumonlangan odamlarning o‘ldirilishi haqida ketmoqda. Ba’zi qotilliklar o‘zboshimchalik bilan sodir etilgan.
BMT shuningdek, jinsiy zo‘ravonlik bo‘yicha 108 ta ehtimoliy holat (jumladan, 78 ta zo‘rlash) haqida ma’lumot oldi. Missiya 23 ta holatni tasdiqlashga muvaffaq bo‘ldi, jumladan, guruh bo‘lib zo‘rlash, qiynoqlar, jamoat joylarida majburan yechintirish va jinsiy zo‘ravonlik tahdidi kabi. 13 holatda qurbonlar erkaklar, to‘qqiz nafari ayollar va bir nafari qiz bola bo‘lgan.
Aksariyat holatlar Rossiya qurolli kuchlari nazorati ostidagi hududlarda sodir etilgan, biroq Ukraina hukumati nazoratidagi hududlarda ham shunday holatlar mavjud.
Hisobotda, shuningdek, har ikki tomonning harbiy asirlarga nisbatan muomala qoidalarini buzish holatlari haqida so‘z boradi. Birlashgan Millatlar Tashkiloti suddan tashqari qatl qilish, qiynoqlar, shafqatsiz muomala va tibbiy yordam ko‘rsatmaslik holatlarini hujjatlashtirgan.
Izoh (0)