“Bizda hech kim shunchaki duch kelgan joylarni o‘qqa tutib ketavermaydi”. Putin — Kremenchugdagi savdo markaziga berilgan raketa zarbasi haqida

Rossiya prezidenti Vladimir Putin Kremenchugdagi savdo markaziga raketa bilan berilgan zarba “razvedka qilingan nishonlarga” nisbatan amalga oshirilganiga ishonch bildirdi, deb yozadi Meduza.

Ashxobodda jurnalistlarning savollariga javo berar ekan, Putin Ukraina harbiylari texnikani “turar joy dahalari va yana allaqayerlarga” joylashtirishini, shuningdek, “har xil omborlar, bozorlarga” yashirishini, Rossiya harbiylari esa shu obyektlarga zarbalar berishini, fuqarolarni nishonga olmasligini aytdi.

“Bizda hech kim shunchaki duch kelgan joylarni o‘qqa tutib ketavermaydi… Odatda bu razvedka qilingan, o‘rganilgan nishonlarga nisbatan amalga oshiriladi… Ishonchim komilki, bu holatda ham xuddi shunday bo‘lgan. Axir ular G‘arb yetkazib berayotgan texnikani har xil omborlarga, bozorlarga, zavodlarga, sexlarga yashirmoqda, u yerda texnika ta’mirlanadi yoki xuddi shu chet el bilan uzoq davom etgan kimo‘zardan keyin tartibga keltiriladi. Rossiya armiyasi hech qanaqa fuqarolik obyektlariga zarba berayotgani yo‘q”, — dedi Rossiya prezidenti.

Rossiya Poltava viloyatidagi Kremenchug shahriga 27-iyun kuni raketa bilan zarba berdi. Oqibatda “Amstor” savdo markazining bir qismi vayron bo‘lib, yong‘in boshlandi, kamida 20 kishi halok bo‘lib, qariyb 60 kishi jarohatlandi, yana 20 dan ziyod odam bedarak yo‘qolgan deb hisoblanilmoqda.

Rossiya Mudofaa vazirligi Amerika qurol-yarog‘lari saqlanadigan omborga zarba berganini, go‘yoki “faoliyat olib bormayotgan” savdo markazidagi yong‘inga esa o‘q-dorilarning portlab ketishi sabab bo‘lganini ma’lum qildi.