AQSH ushbu bosqichda Rossiya va Ukraina o‘rtasida tinchlik bitimiga erishish uchun imkoniyatlarni ko‘rmayapti. Bu haqda AQSH Milliy razvedkasi direktori Avril Xeyns ma’lum qildi, deb yozadi “RBK”.
“Bilasizmi, rostini aytganda, bu bosqichda biz ikkala tomon tinchlik haqida kelishuvga erishishi uchun imkoniyatlarni ko‘rmayapmiz, buni, menimcha, hamma tushunib turibdi”, — dedi u.
Shu bilan birga, Xeynsning so‘zlariga ko‘ra, Rossiya prezidenti Vladimir Putinning “Ukrainaning kattaroq qismini bosib olish” maqsadlari o‘zgarmagan va u hamon uning “neytralligi”ga erishmoqchi. “Manzara ancha noxush bo‘lib qolmoqda, Rossiyaning G‘arbga munosabati esa keskinlashmoqda”, — dedi razvedka rahbari.
Ukrainadagi vaziyatni tinch yo‘l bilan tartibga solish bo‘yicha muzokaralar martdan buyon davom etmoqda. Tomonlar bir necha marta yuzma-yuz uchrashdi, ularning so‘nggisi 29-mart kuni Istanbulda Rossiya, Ukraina va Turkiya tashqi ishlar vazirlari ishtirokida bo‘lib o‘tdi. Uchrashuv yakunida tomonlar ahamiyatli progressga erishilganini ma’lum qildi, bir kundan keyin esa Rossiya Mudofaa vazirligi Kuyev va Chernigov yo‘nalishlaridan qo‘shinlar olib ketilganini e’lon qildi.
Shunga qaramay, aprelda Ukraina muzokaralarni to‘xtatdi. Bu chet el agentliklari tomonidan Kiyev viloyati Bucha shahridagi tinch aholi jasadlari fotosuratlari e’lon qilinganidan keyin yuz berdi.
Rossiya prezidenti matbuot kotibi Dmitriy Peskov Moskva maxsus operatsiyalarni muzokaralar yo‘li bilan yakunlashni istashini ta’kidlagandi. Shu bilan birga, u Ukraina bir kundayoq jangovar harakatlar to‘xtatilishiga erishishi mumkinligini, buning uchun o‘z harbiylariga qurollarni tushirishni buyurishi va Moskvaning shartlarini bajarishi kifoyaligini aytgandi.
Izoh (0)