Бирлашган Миллатлар Ташкилоти Инсон ҳуқуқлари бўйича бошқармасининг мониторинг миссияси 29 июнь куни Украинадаги уруш пайтида инсон ҳуқуқларининг бузилиши ҳақида ҳисобот эълон қилди.
Ҳисобот 2022 йил 24 февралдан 15 майгача тўпланган маълумотларни акс эттиради.
Бу даврда, хусусан, кузатув миссияси аъзолари россиялик ҳарбийлар томонидан ҳарбий ҳаракатлардан ташқари содир этилган 300 дан ортиқ тинч аҳолининг ўлдирилиши тўғрисидаги маълумотларга эга бўлди. Гап, бошқа нарсалар қаторида, қочишга уринаётган фуқаролик автомашиналарининг ўққа тутилиши ва Украина Қуролли Кучларида ишлаганликда гумонланган одамларнинг ўлдирилиши ҳақида кетмоқда. Баъзи қотилликлар ўзбошимчалик билан содир этилган.
БМТ шунингдек, жинсий зўравонлик бўйича 108 та эҳтимолий ҳолат (жумладан, 78 та зўрлаш) ҳақида маълумот олди. Миссия 23 та ҳолатни тасдиқлашга муваффақ бўлди, жумладан, гуруҳ бўлиб зўрлаш, қийноқлар, жамоат жойларида мажбуран ечинтириш ва жинсий зўравонлик таҳдиди каби. 13 ҳолатда қурбонлар эркаклар, тўққиз нафари аёллар ва бир нафари қиз бола бўлган.
Аксарият ҳолатлар Россия қуролли кучлари назорати остидаги ҳудудларда содир этилган, бироқ Украина ҳукумати назоратидаги ҳудудларда ҳам шундай ҳолатлар мавжуд.
Ҳисоботда, шунингдек, ҳар икки томоннинг ҳарбий асирларга нисбатан муомала қоидаларини бузиш ҳолатлари ҳақида сўз боради. Бирлашган Миллатлар Ташкилоти суддан ташқари қатл қилиш, қийноқлар, шафқатсиз муомала ва тиббий ёрдам кўрсатмаслик ҳолатларини ҳужжатлаштирган.
Изоҳ (0)