Putin Ukrainadagi maxsus operatsiyaning tub maqsadini ma’lum qildi va uning muddati haqida gapirmaslikni taklif etdi

Ukrainadagi Rossiya harbiy operatsiyasining yakuniy maqsadi Donbassni ozod qilish va Rossiyaning o‘zi uchun xavfsizlikni kafolatlash hisoblanadi. Bu haqda mamlakat prezidenti Vladimir Putin oltinchi Kaspiy sammitidan keyin aytib o‘tdi, deb yozadi “RBK”.

“Tub maqsadni men belgilab qo‘yganman — bu Donbassni ozod etish, bu odamlarni himoya qilish va Rossiyaning o‘z xavfsizligini ta’minlay oladigan sharoitlarni yaratish”, — dedi Putin.

Qo‘shinlar belgilangan marralargacha yetib boryapti, lekin operatsiyaning tugash muddatlari haqida gapirmasa ham bo‘ladi, harbiylarni jadallashtirish — noto‘g‘ri, dedi prezident.

“Bu [maxsus operatsiyalar muddati] jangovar harakatlar tezligiga bog‘liq, u esa bevosita ehtimoliy talafotlarga borib taqaladi, biz avvalo yigitlarimiz hayotlarini saqlab qolish haqida o‘ylashimiz kerak”, — deya qo‘shib qo‘ydi u.

Shuningdek, davlat rahbari qayd etishicha, u maxsus operatsiyani olib borayotgan harbiylarga ishonadi. Uning fikricha, ular qanday zarur deb hisoblasa, shunday harakat qilmoqda. “Men, albatta, oliy bosh qo‘mondonman, biroq Bosh shtab akademiyasini bitirmaganman. Men professional bo‘lgan odamlarga ishonaman”, — dedi Putin.

24-fevral kuni Putin harbiy operatsiya o‘tkazilishini e’lon qilganida uning maqsadi Ukrainani “demilitarizatsiya va denatsifikatsiya qilish” (qurolsizlantirish va natsizmni yo‘qotish), shuningdek, Donbassning tinch aholisini “genotsid”dan himoya qilish ekanini aytgandi.

Prezident matbuot kotibi Dmitriy Peskov denatsifikatsiya deganda nima nazarda tutilayotganini tushuntirib, “Ukrainani ozod qilish va uni natsistlar kayfiyatidagi odamlardan tozalash” zarurligini aytgandi. U, shuningdek, so‘nggi vaqtlarda “anchagina” o‘sgan “harbiy potensialni neytrallashtirish” zaruriyatini ham ta’kidlagandi.

May oyida Rossiya tashqi ishlar vaziri Sergey Lavrov maxsus operatsiyalar maqsadi sifatida sharqiy Ukraina va Rossiya xavfsizligini ta’minlashni aytgandi. U Rossiya tomoni Ukrainada hokimiyat almashishini yoki prezident Vladimir Zelenskiy taslim bo‘lishini talab qilmasligini qayd etdi. U Ukrainadagi maxsus operatsiya tezligi “tinch fuqarolar va rossiyalik harbiy xizmatchilar uchun har qanday xavflarni minimallashtirish zaruriyatiga” bog‘liqligini aytdi.

G7 mamlakatlari sammitida so‘zlagan nutqida Zelenskiy jangovar harakatlar yil oxirigacha, qish boshlangunicha tugashini xohlashini aytdi.