Fransiyada 2015-yil 13-noyabr kuni Parijda sodir etilgan hujumlarda qatnashgan terrorchilarga hukm chiqarildi, deb yozadi “RBK”. O‘shanda “Stad de Frans” stadioni yaqinida portlash yuz bergan, bir nechta restoranlar xo‘randalari otib tashlangan va “Bataklan” konsert zalida qirg‘in bo‘lgan edi.
Jami 20 nafar terrorchi sudlandi. Ularning ba’zilari umrbod qamoq jazosi oldi, bular teraktlar tashkilotchisi deb gumonlanayotgan Saloh Abdislom, shuningdek, Muhammad Abriniy, Fabyan Klen, Jan-Mishel Klen, Ahmad Alhald, Usama Atar va Obeyda Aref Dibo. Ulardan ayrimlari, masalan, Abdislom qamoqda muddatsiz qoladi, boshqalar uchun esa “xavfsizlik muddati” belgilandi, shu vaqt tugaganidan keyin ular shartli ravishda muddatidan oldin ozodlikka chiqa oladi, — misol uchun, Abriniy uchun bunday muddat 22 yilga teng.
Qolganlar ikki yildan 30 yilgacha ozodlikdan mahrum etilishga hukm qilindi. Eng ko‘p muddatni (30 yil) Ahmad Dahmoniy, Sofiyen Ayariy, Muhammad Baqqoliy va Usama Krayyem oldi. Adel Xaddadi va Muhammad Usmon 18 yilga, Ali al Xaddad Asufiy — 10 yilga, Muhammad Amriy va Yasin Atar — 8 yilga, Ali Ulkadiy — besh yilga (uch yili shartli), Hamza Atu va Abdulla Shuaa — to‘rt yilga (ikki yili shartli) hamda Farid Xarxach ikki yilga ozodlikdan mahrum etildi.
Mahkumlar o‘n kun ichida hukm ustidan shikoyat arizasi berishi mumkin.
Parijdagi teraktlar 2015-yil 13-dan 14-noyabrga o‘tar kechasi shaharda va shahar tashqarisi Sen-Denidagi oltita turli nuqtada kichik vaqt oraliqlari bilan sodir bo‘lgandi. Uch nafar terrorchi Fransiya va Germaniya terma jamoalari o‘rtasida futbol musobaqasi bo‘lib o‘tayotgan “Stad de Frans” standioni yaqinida xudkushlik kamarini portlatib yuborgan. Boshqa bir guruh Parij sharqidagi kafe va restoranlarga hujum qilgan. Yana uch kishi “Bataklan” konsert zalida odamlarni garovga olgan. Teraktlar oqibatida jami 130 kishi halok bo‘lib, 350 dan ortiq odam yaralangan edi.
Voqealar uchun javobgarlikni IShID o‘z bo‘yniga oldi. Teraktlardan keyin mamlakatda favqulodda holat rejimi e’lon qilinib, u bir necha marta uzaytirilgandi.
Teraktlar tashkilotchisi deb gumon qilinayotgan Saloh Abdislom 2016-yil martida Bryusselda qo‘lga olingan va Fransiyaga keltirilgandi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)