Samarqand shahri va tumanida istiqomat qiluvchi “Hizb ut-Tahrir” diniy-ekstremistik tashkiloti a’zolarining faoliyatiga chek qo‘yildi. Bu haqda Samarqand viloyati IIB axborot xizmati xabar berdi.
Huquqni muhofaza qilish idoralari xodimlari tomonidan amalga oshirilgan tezkor tadbirlar natijasida faoliyatiga chek qo‘yilgan ushbu jinoiy guruh tashkilotchilari bo‘lgan G.S. va R.A. jinoiy sheriklariga “Hizb ut-Tahrir”ning “Islom nizomi” nomli kitobi va “Al-Va’y” jurnalidan foydalangan holda boshqalarga dars o‘tib, O‘zbekistonda konstitutsion tuzumni ag‘darib, xalifalik davlatini tiklashga targ‘ib qilib kegan.
Shuningdek, G.S. va R.A. ota-onalari, yaqinlari va ko‘plab tanishlarini o‘z saflariga a’zo bo‘lishga da’vat qilib, internet orqali ekstremistik mazmundagi audio va video materiallarni tarqatgan.
Mazkur jinoiy guruhning faoliyati ayni paytda Polshada yashirinib kelayotgan “Hizb ut-Tahrir” diniy-ekstremistik tashkilotning g‘oyaviy yetkachilaridan biri bo‘lgan, O‘zbekistondagi va xorijdagi vatandoshlarimizni radikallashuviga hamda jinoyatchiga aynalib qolishlariga sababchi bo‘layotgan 1980-yilda Qirg‘izistonda tug‘ilgan, mazkur davlat fuqarosi, sodir etgan jinoyatlari uchun xalqaro qidiruvda bo‘lgan “Mahmud Abdulmo‘min” taxallusli Mahmudjon Xoldarov tomonidan boshqarilgan.
Hozirda ushbu shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari amalga oshirilmoqda.
Bundan oldin Xorazmda Suriyadagi jangarilar safiga qo‘shilishni rejalashtirgan 4 nafar yigit ushlangani, o‘zbekistonlik fuqaro MDH davlatlaridan birida qo‘poruvchilik harakatini sodir etmoqchi bo‘lgani aniqlangani, Toshkentda Suriyaga borib, jangarilar safiga qo‘shilishni rejalashtirgan talaba va ikki nafar maktab o‘quvchisi ushlangani to‘g‘risida xabar berilgandi.
Izoh (0)