“Yaqin 10-15 kun tonirovka qiladiganlarning oshig‘i olchi bo‘ladi”. O‘zbekistonliklar tonirovkaning arzonlashishi va tekin bo‘lishiga qanday munosabat bildirdi?

Prezidentning “Avtotransport vositalaridan foydalanishda aholiga qo‘shimcha qulayliklar yaratish chora-tadbirlari to‘g‘risida”gi qarori bilan 1-iyuldan boshlab avtomobilning orqa yon oynalarini qoraytirish to‘lovlari bekor qilinadi, ya’ni bepul bo‘ldi. Shuningdek, old va orqa yon oynalarni to‘liq qoraytirish to‘lovlari 6 barobargacha arzonlashtirildi.

O‘zbekistonliklar tonirovkaning arzonlashishi va tekin bo‘lishiga qanday munosabat bildirdi? “Daryo” jamoatchilik tomonidan aytilgan fikrlarni bir joyga to‘pladi.

Telegramdagi “HabiCatura” kanali muallifi ushbu mavzu yuzasidan karikatura chizdi.

“Tonirovkalar muborak bo‘lsin”

Bugundan pleks va pleks tortadigan ustalar karrasiga narxni oshiradilar.

Keyin yana bir karrasiga oshiradilar. Qarabsizki Ali Xo‘ja Xo‘ja Ali bo‘ladi.

Tonirovkalar muborak bo‘lsin.

P/S: Mabodo yaqin kunlarda 13 millionga tonirovka tortganlarni bugungi narx bilan xisoblab ortiqchasini qaytarish taklifini ko‘rib chiqishmasmikin?

Xurshid Daliyev, bloger

“Kondyor bor bo‘lsa tonirovkasizam jinam urmaydi”

Baribir millionlab mashinalarni konditsioneri yo‘q. Bunaqa issiqda tonirovkali oynani yopib yursangam issiqdan o‘lasan kondyor yo‘q bo‘lsa. Kondyor bor bo‘lsa tonirovkasizam jinam urmaydi.

Moshinamizga davlat tekinga konditsioner o‘rnatib bersin deb chiqishmadimi hali bratlar?

Eeee yo‘qale devorishsa kerak)

Tonirovka 12 mlnligida 1000 ta odam qildirgan bo‘lsa 12 mlrd so‘m profit. Endi 2.5 mlndan 100 mingta odam qildirsa 250 mlrd so‘m profit.

Nurbek Alimov, bloger

1-iyul kunidan boshlab avtoservislarda orqa tonirovka yopishtirish 1 mln, to‘liq tonirovka esa 10 mln…  bo‘lmasligi uchun birdaniga hamma tonirovka qilishga yugurib bormasa yaxshi bo‘lardi.

Davron Fayziyev, jurnalist

“Yaqin 10-15 kun tonirovka qiladiganlarning oshig‘i olchi bo‘ladi”

Ko‘chaga hali hech kim chiqmadimi bayram qilgani? Karnay-surnay, feyerverk va salyutlar ovozi eshitilmayaptimi?

Yaqin 10-15 kun tonirovka qiladiganlarning oshig‘i olchi bo‘ladi. Xuddi 8-mart kuniga gullarga talab bo‘lganidek, oynaga plyonka tortadiganlarning ketmoni balaaaaand uchadi.

Plyonka olib kiradiganlar va sotadiganlar ham oligarx bo‘lib ketishadi. Bozorda plyonka narxi keskin ko‘tarilib, uni yopishtiradiganlarning xizmat haqlari oshishi ehtimoli bor.

Sekiiin yuraveraylik ehtiyot bo‘lib.

Bobur Akmalov, jurnalist

“Voy alamjon, jooon alam....”

2-3 kun avval 10 million to‘lab tonirovka qildirgan bratlar uchun bugun boshni yostiq tagiga tiqib, chuqur nafas olgancha 2 daqiqalik sukut saqlaymiz.

Jizzillab achishayotganini bilaman bratim...

1-iyul bu Xalqaro ba’zi tonirovka yopishtiruvchilar iymonni ishton, vijdonni kalish qilib kiyadigan kun sifatida yurtimizda shopirlarning qarg‘ishi ostida keng nishonlashini kutilmoqda.

P.S. Narxni oshirmanglar tonirovka yopishtiruvchilar.

Yopishtirib ketishmasin deymanda...

Otabek Artikov, bloger

“Jarimalar loyihasining taqdiri nima bo‘ladi?”

O‘zbekistonda avtomobil oylarini ruxsatsiz qoraytirganlik uchun 25–40 BHM (7,5 - 12 million so‘m) jarima belgilangan. Bu – boshqa xavfliroq huquqbuzarliklar, masalan qoidani buzib qarama-qarshi harakat bo‘lagiga chiqib ketganlik uchun belgilangan jazodan 2,5 barobarga og‘ir. Tasavvur qil)

Jarimalar ko‘rib chiqilyapti deyilgandi. Bu loyiha taqdiri nima bo‘ladi? Buni ham deputatlarmas, prezident hal qiladimi yoki?

Zafarbek Solijonov, bloger

“ ‘Tonirovka‘ arzonladi va tekin bo‘ldi. Lekin bu kam”

1-iyuldan boshlab mashinalarga “tonirovka” qiluvchilarning xizmat haqqi ham oshsa kerak, ehtimol, karrasiga. Ularga insof, o‘zbekistonliklarga navbatda turishda sabr tilagan holda “tonirovka”ning arzon yoki tekin bo‘lishi — barcha muammolar hal bo‘ldi degani emasligini aytmoqchimiz.

Masalan, Tvitter nega hali hamon blokda? O‘tgan hafta bu tarmoqning blokdan ochilishi haqida mujdalar chiqqandi, lekin hozirgacha bunday bo‘lmadi.

Aftidan karantin qaytayotganga o‘xshaydi. Prezident yig‘ilishlarida amaldorlar maska taqqan holda ko‘rinish beryapti. Lekin bu holat butun mamlakat bo‘ylab joriy qilinadimi, yo‘qmi, shu ham savol. Mutasaddilar o‘tgan hafta koronavirusga chalinganlar ortayotgani hamda hozirgi holat bo‘yicha chiqib izoh bersa bo‘ladi.

Va albatta yillar davomida gapirib kelinadigan muammolar bor. Ular ham tezroq o‘z yechimini topishidan umidvormiz. Shu kecha-kunduzda tezroq hal etilishi, izoh berilishi kerak bo‘lgan masalalar hal bo‘lsin, tizimli muammolarni ham imkon qadar jadalroq hal qilishga kirishish kerak.

“Tonirovka” o‘zbekistonliklar uchun uchinchi yoki to‘rtinchi, ta’bir joiz bo‘lsa — o‘ninchi o‘rindagi masala bo‘lishi, hozirgidek muhokamalarga arzimasligi kerak, aslida.

“Safar” Telegram-kanali

“Demak mumkin ekan, 15 yillab odamlarni qiynashdan nima naf edi”

Mantiqni qara.

Avvaliga tonirovka qilingan mashina ichida terroristlar yurishi mumkin edi, pullik bo‘ldi, gitara bo‘ldi kim yurishi.

Pullik bo‘lgach butun, deyarli 25 mln xalq talab qildi, KabMin va IIV bunga qattiq qarshilik qildi, biror sababsiz.

Bitta Prezident butun xalq irodasidan ustun kelib, Konstitutsiyada Prezidentlik vakolati nollashish, yana 15-20 yil qo‘shilishi arafasida marhamat qilib, deyarli bepul qildi.

Demak mumkin ekan, 15 yillab odamlarni qiynashdan nima naf edi.

Teshiblar chiqsin bahona qilib yig‘ib olingan pullar.

Olimjon Haydarov, bloger

“Tonirovka tekin bo‘lib ayrim och tadbirkorlar haddidan oshmasa bo‘ldi”

Ammo, lekin, biroq, nafsi xakalak otgan tadbirkorlar oddiy Xalqni talashiga yuz foiz ishonchim bor!

Bunday nafsi xakalak otgan tadbirkorlarga darhol qonuniy jazoni qo‘llashni tavsiya qilaman!

O‘zbekistonda har qanday yengillik berilgani bilan qandaydir yo‘llarni ihtiro qilib Xalqni talash ishlari avjida bo‘lgan va bundan keyin ham bo‘ladi.

Prezident imkon yaratib berdi! Rahmat.

Lekin shu berilgan imkoniyatni suiste’mol qiluvchi akulalar ko‘payishi achinarli holdir.

Nigora Alimova, bloger