Davlat xavfsizlik xizmati Samarqand viloyati bo‘yicha boshqarmasi, “Samarqand hududiy elektr tarmoqlari korxonasi” AJ hamda viloyat IIB xodimlari hamkorligida Qo‘shrabot tumanida o‘tkazilgan tezkor tadbirlar davomida kriptovalyuta ishlab chiqarish maqsadida noqonuniy mayning ferma tashkil qilish holati aniqlandi. Bu haqda Zarnews nashri xabar berdi.
Tezkor tadbirda tumanning “Qo‘rg‘on” mahallasi Istiqbol qishlog‘ida yashovchi, tuman elektr tarmoqlari korxonasi elektromontyori bo‘lib ishlab kelayotgan 28 yoshli Sh.X.ga tegishli bo‘lgan noturar binoning yuqori kuchlanishli elektr tarmog‘iga ulangan tadbir ishtirokchilarida shubha uyg‘otgan. Olib borilgan o‘rganishlar natijasida mazkur noturar binoda kriptovalyuta ishlab chiqarish uchun noqonuniy mayning ferma tashkil qilingani aniqlangan. Shuningdek, elektr energiyasi tarmog‘iga noqonuniy ravishda ulanib, o‘rnatilgan transformator punktida katta yuklama mavjudligi hamda sutkasiga juda ko‘p miqdorda elektr energiyasi talon-toroj qilinayotgani ma’lum bo‘lgan.
Noturar bino ko‘zdan kechirilganda mayning ferma uchun mo‘ljallangan jami 64 dona “Antminer L3 S9” modelli quvvat manbai, 5 dona server qurilmalari hamda 1 dona Wi-Fi router mavjudligi aniqlanib, ushbu qurilmalar xolislar ishtirokida rasmiylashtirilgan.
Ushbu fermada amalga oshirilgan noqonuniy xatti-harakatlar oqibatida “Samarqand hududiy elektr tarmoqlari korxonasi”ga Sh.X. tomonidan yetkazilgan zarar birlamchi hisob-kitoblarga ko‘ra, 1 milliard so‘mdan ortiqni tashkil etadi.
Hozirda mazkur holat yuzasidan to‘plangan hujjatlar asosida Jinoyat kodeksining tegishli bandlari bilan jinoyat ishi qo‘zg‘atilmoqda.
Avvalroq O‘zbekistonda kripto-aktivlar mayningini ro‘yxatdan o‘tkazish tartibi to‘g‘risidagi nizom loyihasi e’lon qilingani to‘g‘risida xabar berilgandi.
Izoh (0)