Jamoatchilik muhokamasiga qo‘yilgan “Yoqilg‘i-energetika resurslari narxlarini o‘zgartirish to‘g‘risida”gi Vazirlar Mahkamasi qarori loyihasi ishchi guruh tomonidan o‘rganilmoqda. Bu haqda Energetika vazirligi matbuot xizmati xabar berdi.
Ma’lum qilinishicha, mazkur loyiha doirasida fuqarolardan mingdan ortiq murojaat kelib tushgan bo‘lib, ayni paytda Energetika, Moliya, Iqtisodiy taraqqiyot va kambag‘allikni qisqartirish vazirliklari mutaxassislari tomonidan o‘rganilib, tahlil qilinmoqda.
Qabul qilingan takliflar bo‘yicha barcha xulosalar va mutaxassislarning xulosalari taqdim etilgandan so‘ng, ushbu masala bo‘yicha yakuniy va tegishli qaror qabul qilinadi.
Qabul qilingan me’yoriy-huquqiy hujjatlarga ko‘ra, tariflarning o‘zgarishi hukumat qarori qabul qilingan kundan boshlab 15 kundan keyin kuchga kiradi.
“Shu munosabat bilan 2022-yil 1-iyuldan elektr va gaz tariflariga o‘zgartirishlar kiritilmasligini ma’lum qilamiz”, — deyiladi xabarda.
Avvalrqo Iqtisodiy taraqqiyot va kambag‘allikni qisqartirish vazirligi boshqarma boshlig‘i Quvonchbek Mustafoyev va Moliya vazirligi bo‘lim boshlig‘i Bahodir Jo‘rayev “Daryo” nashri uchun bergan intervyusida mazkur qaror loyihasida belgilangan vazifalar haqida batafsil ma’lumot bergandi.
Izoh (0)