NATO Ukrainaga “suveren va mustaqil Yevropa mamlakati” bo‘lib qolishda yordam berishni istaydi, dedi alyans bosh kotibi Yens Stoltenberg. Uning fikricha, Ukrainadagi harbiy nizoni muzokaralar yordamida hal qilishga erishiladi.
Ispaniyaning El Pais gazetasiga bergan intervyusida Stoltenberg NATO va Rossiya o‘rtasida “umumiy urush yo‘q”ligini aytdi. Shu bilan birga, u Rossiyaning Ukrainadagi harbiy operatsiyasi tufayli unga qarshi sanksiyalarni kuchaytirishni yoqlab chiqdi.
“Katta ehtimol bilan bu urush muzokaralar stoli atrofida tugaydi. Biz Ukrainaning maksimal kuchli pozitsiyasini ta’minlashga javob beramiz… Va buni amalga oshirishning eng yaxshi usuli — kuchli harbiy va iqtisodiy ko‘mak berish hamda Rossiyaga qarshi qat’iy sanksiyalarni ilgari surish”, — dedi alyans bosh kotibi.
19-iyun kuni Yens Stoltenberg ittifoqdoshlarni Ukrainadagi harbiy harakatlar bir necha yil davom etishi mumkinligiga tayyor turishga chaqirgandi. Buyuk Britaniya bosh vaziri Boris Jonson ham shunga o‘xshash fikrda. AQSH prezidenti Jo Bayden fikricha, Ukrainadagi ziddiyat Rossiya va Yevropa o‘rtasida chidamlilik bo‘yicha musobaqaga aylanadi.
Avvalroq Rossiya tashqi ishlar vaziri Sergey Lavrov Yevropa Ittifoqi va NATO davlatlari Rossiya bilan urushga tayyorlanmoqda, degan fikrni bildirgandi.
Izoh (0)