Amerika harbiy samolyotining Tayvan bo‘g‘ozi ustidan parvozi mintaqadagi tinchlik va barqarorlikka xavf soldi, shu munosabat bilan Xitoy qat’iy norozilik bildirdi, deb ma’lum qildi Xitoy armiyasi jangovar qo‘mondonligi Sharqiy zonasi vakili Shi I.
“Amerika tomonining harakatlari mintaqaga aralashuv va beqarorlikni ataylab buzish, Tayvan bo‘g‘ozida tinchlik va barqarorlikka xavf solishdir. Biz bunga qat’iyan qarshi chiqamiz”, — deya ta’kidladi armiya vakili.
Uning qo‘shimcha qilishicha, Xitoy qurolli kuchlari mamlakat “milliy suvereniteti va hududiy yaxlitligini qat’iy himoya qilish uchun doimiy ravishda yuqori jangovar shaylik holatida turadi”.
Avvalroq AQSH Hind-Tinch okeani qo‘mondonligi bayonot e’lon qilib, 24-iyun kuni Tayvan bo‘g‘ozi osmonidan AQSH Harbiy-dengiz kuchlarining P-8A Poseidon qayiq hujumiga qarshi patrul samolyoti uchib o‘tganini ma’lum qilgandi. Unda aytilishicha, bu bilan AQSH o‘zining erkin va ochiq Hind-Tinch okeani mintaqasi tarafdori ekanini namoyish qilgan.
Xitoyning Global Times nashri Tayvan Xitoyning ajralmas qismi ekanini, Tayvan masalasi esa faqat Xitoyning ichki muammosi bo’lib, mamlakat suvereniteti va hududiy yaxlitligi bilan chambarchas bog‘liq ekanini ta’kidladi.
“AQSH va uning ittifoqchilari avvalroq Tayvan bo‘g‘ozining katta qismini ‘xalqaro suvlar’ deb ataganini qayd etish joiz”, — deb yozadi gazeta.
AQSH Davlat departamenti vakili Ned Prays 14-iyun kuni “Tayvan bo‘g‘ozi xalqaro akvatoriya” ekanini va AQSH “xalqaro huquq bilan ruxsat etilgan hamma joyda, shu jumladan, Tayvan bo‘g‘ozida ham uchish, suzish va harakat qilishda davom etishi”ni aytgandi.
Nashr qayd etishicha, AQSH harbiy kemalari “kuchini ko‘z-ko‘z qilib, inqirozlarni yuzaga keltirib va ‘mustaqil Tayvan’ ayirmachilik kuchlariga noto‘g‘ri signallar yuborib”, tez-tez bo‘g‘ozdan o‘tib turadi.
“Bu juda mas’uliyatsiz va xavfli xatti-harakatlar, ular olov bilan o‘ynashishga teng”, — deyiladi Global Times maqolasida.
Izoh (0)