Butun dunyo bo‘ylab bolalarda kelib chiqishi noma’lum bo‘lgan og‘ir o‘tkir gepatitga chalinish bo‘yicha 920 ta ehtimoliy holat aniqlangan, deb yozadi “RBK” Jahon sog‘liqni saqlash tashkiloti (JSST)ga tayanib.
May oyidan beri bunday holatlar 270 taga ko‘paygan. Kasallanganlarning jinsi va yoshi ma’lum bo‘lgan 422 ta holatdan aksariyati o‘g‘il bolalar hissasiga to‘g‘ri keladi, ularning ko‘pchiligi olti yoshdan kichik.
Barcha holatlarning yarmidan ko‘pi Yevropa, xususan, 267 tasi Buyuk Britaniya ulushiga to‘g‘ri keladi, kasallik birinchi marta aynan u yerda aniqlangan va kasallanganlarning eng katta soni qayd etilgan edi. Umumiy holatlarning uchdan bir qismi AQSHda aniqlangan.
Noma’lum gepatit holatlari qayd etilgan mamlakatlar soni maydan buyon o‘zgarmadi va 33 tani tashkil etmoqda. Kasallanganlar aniqlangan davlatlar orasida nafaqat Yevropa va Shimoliy Amerika mamlakatlari, balki Argentina, Isroil, Yaponiya kabilar ham bordir.
JSST ma’lumotlariga ko‘ra, gepatitning ushbu turida bolalarda o‘tkir jigar yetishmovchiligi rivojlanadi. Iyun holatiga, 45 nafar bolaga jigar transplantatsiyasi kerak bo‘lgan, 18 ta o‘lim qayd etilgan. Tarqalish manbasi va yuqish yo‘llari o‘rganilmoqda, keng tarqalgan gepatit viruslari (A, B, C, D va E) ushbu kasallanish holatlarida aniqlanmagan.
Izoh (0)