Avstraliya, Yaponiya, Yangi Zelandiya, Buyuk Britaniya va AQSH Tinch okeanida hamkorlik bo‘yicha yangi tashkilot — Partners in the Blue Pacific (PBP, Tinch okeani mintaqasidagi sheriklar)ni tuzdi, deb yozadi “RBK” Oq uy saytiga tayanib.
“Bugun beshta mamlakatlarimiz Tinch okeanidagi birlamchi masalalarni yanada samarali va amaliy qo‘llab-quvvatlash uchun keng qamrovli norasmiy mexanizm — Partners in the Blue Pacific (PBP)’ni ishga tushirdi”, — deyiladi xabarda.
Tashkilot o‘z oldiga uchta asosiy vazifani qo‘ydi, bular:
- Tinch okeani orollari forumi tomonidan ishlab chiqiladigan mintaqa uchun 2050-yilgacha bo‘lgan strategiyaga (u siyosat, iqtisodiyot, xavfsizlik, ekologiya kabi yettita sohani o‘z ichiga oladi, shu yilning iyulida taqdim etilishi kerak) muvofiq mintaqadagi birlamchi vazifalarni qo‘llab-quvvatlashga ko‘proq kuch yo‘naltirish.
- Tinch okeani regionalizmini mustahkamlash hamda mintaqa hokimiyatlari va PBP’ga a’zo mamlakatlar hukumatlari o‘rtasidagi aloqani yo‘lga qo‘yish.
- Tinch okeani mintaqasi va dunyo o‘rtasidagi hamkorlik uchun imkoniyatlarni kengaytirish.
Aprelda AQSH o‘zining Tinch okeanidagi ittifoqchilari, shu jumladan, Avstraliya, Yaponiya va Yangi Zelandiya bilan hamkorlikni kuchaytirish niyatini ma’lum qilgandi. Ta’kidlanishicha, Vashington “XXI asrning dengiz xavfsizligi va iqtisodiy rivojlanishdan tortib iqlim inqirozi va COVID-19 gacha bo‘lgan muammolarini hal qilish uchun o‘zining mintaqadagi ishtirokini faollashtirishga” qaror qilgan.
Ushbu bayonot Xitoyning Tinch okeani janubi-g‘arbiy qismidagi Solomon orollari bilan ittifoqchilik va xavfsizlik sohasidagi hamkorlik haqida shartnoma tuzishi fonida berilgandi. AQSH va uning ittifoqdoshlari hujjat imzolanishi yuzasidan xavotir bildirgan, chunki, ularning fikricha, bu bitim Tinch okeani mintaqasida erkin savdoga xavf solishi mumkin.
Izoh (0)