NATO Ukrainaga yangi qurollar yetkazib berilishini e’lon qiladi

NATO mudofaa vazirlarining Bryusseldagi yig‘ilishida Kiyevga qurol-yarog‘, jumladan, uzoq masofaga o‘t ochuvchi tizimlar yetkazib berilishi haqida e’lon qilinadi. Alyans kelajakda Ukraina armiyasini sovet qurollaridan NATO qurollariga o‘tkazish dasturini qabul qilishi mumkin.

“Ukraina mudofaa vaziri Aleksiy Reznikov chorshanba kuni kechqurun Bryusselda bo‘lib o‘tadigan NATO mudofaa vazirlari yig‘ilishida nutq so‘zlaydi”, — dedi NATO bosh kotibi Yens Stoltenberg mazkur yig‘ilishdan oldingi matbuot anjumanida. “Ukraina mudofaa vaziri Kiyevning qanday qurollarga bo‘lgan ehtiyojini zudlik bilan ta’minlash kerakligi haqida xabar beradi”, — deya qo‘shimcha qildi NATO bosh kotibi.

Shuningdek, uning so‘zlariga ko‘ra, NATO ittifoqchilari Ukrainani qo‘llab-quvvatlash bo‘yicha yangi chora-tadbirlarni e’lon qiladi. “Ittifoqchilar Ukrainani harbiy texnika, jumladan, og‘ir qurollar va uzoq masofaga o‘t ochuvchi tizimlar bilan ta’minlashni davom ettirish tarafdori”, — deydi u.

Avvalroq Ukraina mudofaa vaziri o‘rinbosari Xanna Malyar Kiyev zarur qurollarning atigi 10 foizini olganini ma’lum qilgandi. Stoltenberg bu bayonotga izoh berar ekan: “Biz bugun Ukraina mudofaa vaziri bilan uchrashamiz va vaziyatni qanday yaxshilashimiz mumkinligini muhokama qilamiz. Ittifoqchilar so‘nggi oylarda Ukrainaga misli ko‘rilmagan yordam ko‘rsatdi”, — dedi.

Oy oxirida NATO davlat rahbarlari sammitida Ukrainani qo‘llab-quvvatlash bo‘yicha yana bir keng ko‘lamli dastur e’lon qilinishi mumkin. “Umid qilamanki, sammitda NATOga a’zo yirik davlatlar Ukrainaga uzoq muddatda sovet davridagi qurollardan zamonaviy NATO qurollariga o‘tish va o‘zaro hamkorlikni yaxshilashga ko‘mak beradigan yordam paketini ma’qullaydi”, — deydi Stoltenberg.

Uning eslatishicha, NATO davlatlari allaqachon Ukrainaga milliardlab dollar ko‘mak, jumladan, harbiy yordam bergan.