НАТО Украинага «суверен ва мустақил Европа мамлакати» бўлиб қолишда ёрдам беришни истайди, деди альянс бош котиби Йенс Столтенберг. Унинг фикрича, Украинадаги ҳарбий низони музокаралар ёрдамида ҳал қилишга эришилади.
Испаниянинг El Pais газетасига берган интервьюсида Столтенберг НАТО ва Россия ўртасида «умумий уруш йўқ»лигини айтди. Шу билан бирга, у Россиянинг Украинадаги ҳарбий операцияси туфайли унга қарши санкцияларни кучайтиришни ёқлаб чиқди.
«Катта эҳтимол билан бу уруш музокаралар столи атрофида тугайди. Биз Украинанинг максимал кучли позициясини таъминлашга жавоб берамиз… Ва буни амалга оширишнинг энг яхши усули — кучли ҳарбий ва иқтисодий кўмак бериш ҳамда Россияга қарши қатъий санкцияларни илгари суриш», — деди альянс бош котиби.
19 июнь куни Йенс Столтенберг иттифоқдошларни Украинадаги ҳарбий ҳаракатлар бир неча йил давом этиши мумкинлигига тайёр туришга чақирганди. Буюк Британия бош вазири Борис Жонсон ҳам шунга ўхшаш фикрда. АҚШ президенти Жо Байден фикрича, Украинадаги зиддият Россия ва Европа ўртасида чидамлилик бўйича мусобақага айланади.
Аввалроқ Россия ташқи ишлар вазири Сергей Лавров Европа Иттифоқи ва НАТО давлатлари Россия билан урушга тайёрланмоқда, деган фикрни билдирганди.
Изоҳ (0)