Moldova hukumati Rossiya tomonidan ehtimoliy hujum haqida ma’lumotga ega emas. Bu haqda respublika prezidenti Mayya Sandu Prime telekanali efirida aytib o‘tdi, deb yozadi “RBK”.
“Bizda Rossiya Moldovaga hujum qilishni rejalashtirayotgani bo‘yicha axborot yo‘q. Bizda mavjud ma’lumotlar muayyan darajadagi xavfsizlik hissini beradi, ammo biz, masalan, yarim yildan keyin nima bo‘lishini bilmaymiz”, — dedi u.
Shuningdek, u Moldovada rus tilida so‘zlashuvchi aholiga jabr-zulm qilinmasligini, ularning huquq va erkinliklariga hech kim tegmasligini ma’lum qildi.
Aprelda Rossiya Markaziy harbiy okrug qo‘shinlari qo‘mondonining harbiy-siyosiy masalalar bo‘yicha o‘rinbosari general-mayor Rustam Minnekayev maxsus operatsiyaning ikkinchi bosqichi doirasida Rossiya qo‘shinlari Donbass va Janubiy Ukrainani nazorat ostiga olishi kerakligini aytdi. Bu, uning so‘zlariga ko‘ra, Qrimga, shuningdek, “rus tilli aholiga zulm o‘tkazilishi holatlari qayd etilayotgan” Pridnestrovyega yo‘lak ochib beradi. Pridnestrovye — SSSR tarkibidayoq Moldovadan mustaqil bo‘lib ajralib chiqqanini e’lon qilgan tan olinmagan respublika. Kishinyov va Tiraspol o‘rtasidagi nizo 30 yildan buyon tartibga solingani yo‘q.
Rossiya tashqi ishlar vaziri Sergey Lavrov Moldova Rossiyaning Ukrainadagi maxsus operatsiyasidan xavfsirashi kerakmi, degan savolga javoban, mamlakatni NATOga jalb qilishga urinishlarni ko‘rayotganini aytgandi. “Ular o‘z kelajagi haqida qayg‘urishi kerak, chunki ularni NATOga tortishyapti. Bu Moldova xavfsizligini oshiradi, deb o‘ylamayman”, — degan edi Rossiya tashqi ishlar vaziri.
Shu bilan birga, Lavrovning so‘zlariga ko‘ra, Moldovaga Yevroittifoqqa qo‘shilish uchun nomzod maqomining taqdim etilishi Rossiya uchun tahdid husoblanmaydi.
Moldova Yevroittifoq bilan yaqinlashuv bo‘yicha faol siyosat olib bormoqda. Mamlakat Ukraina bilan bir qatorda Yevroittifoqqa a’zolik nomzodini oldi. Ayni vaqtda, Moldova hukumati mamlakat NATOga qo‘shilishni rejalashtirmayotgani, uning betarafligi esa konstitutsiyada belgilanganini bir necha marta aytgandi. Ukrainaning NATO tomoniga qaratilgan faol qadamlarini Rossiya hukumati maxsus operatsiyaning sabablaridan biri deb atagan.
Izoh (0)