Rossiya sanksiyalari O‘zbekiston energetikasiga qanday ta’sir qilmoqda?

Rossiyaga qarshi sanksiyalar O‘zbekistondagi qayta tiklanadigan energiya bo‘yicha loyihalarini kechiktirib, logistika ta’minot zanjirlariga ta’sir qilmoqda. Bu haqda “Daryo”ga Energy Intelligence’dan ma’lum bo‘ldi.

Energetika sohasidagi uzilgan logistika zanjirlari hamda yuk tashish va sug‘urta bilan bog‘liq muammolar O‘zbekistonda tabiiy gazda ishlaydigan CCGT zavodi qurilishi uchun gaz turbinalarini o‘tkazishni kechiktirdi, — deydi O‘zbekiston energetika vazirligidan Bahrom Umarbekov.

Turbinalar Qora dengizdagi Azov portidan Rossiya daryolari orqali Qozog‘istonning Aqtau portiga, so‘ngra O‘zbekistonga yetkazilishi yoki muqobil ravishda Sankt-Peterburg porti orqali jo‘natilishi kerak edi.

Ammo sug‘urta, sanksiyalar va yuk tashish bilan bog‘liq muammolar tufayli yetkazib berish narxi keskin oshdi, jo‘natmalar esa kechiktirildi.

Sanksiyalar ayrim operatsiyalarga ta’sir qildi”, — deya tan oldi “O‘zbekneftegaz” davlat aksiyadorlik jamiyati boshqaruvi raisining birinchi o‘rinbosari.

Unga ko‘ra, shunga qaramay mamlakatning energetika bo‘yicha rejalari o‘zgarishsiz qoladi, chunki O‘zbekistonda ham texnika, ham texnologiya yetkazib bera oladigan ko‘plab global hamkorlar mavjud.

O‘zbekistonning o‘tish davri maqsadlari

O‘zbekistonda 2050-yilgacha uglerod neytralligiga erishish bo‘yicha rejalar mavjud.

Mamlakat 2030-yilga borib 7 gigavatt quyosh va 5 GVt shamol energiyasini ishlab chiqarishni o‘z oldiga maqsad qilib qo‘ygan. O‘shandan beri arzon narxlarni hisobga olgan holda mintaqada vodorodni o‘zlashtirish masalasini ko‘rib chiqa boshladi.

Xorij bilan hamkorlik O‘zbekistonga o‘z maqsadlariga erishishda muhim ahamiyatga ega. Masalan, 1 megavatt quvvatga ega quyosh stansiyasi 700 ming dollarga tushishi mumkin, demak, 100 MVt quvvatga ega stansiya 70 mln dollarga tushadi, — deya tushuntirdi Umarbekov.

Hozirda investitsiyalar davlat-xususiy sheriklik asosida amalga oshirilmoqda. Bu esa davlat budjetiga qo‘shimcha bosim o‘tkazyapti, shu bois bu yukni xususiy investorlar zimmasiga yuklash rejalashtirilmoqda.

So‘nggi yillarda Yaqin Sharqdagi kompaniyalar, jumladan BAA va Saudiya Arabistonida joylashgan Masdar, Acwa Power va BAA suveren boylik fondi Mubadala kabi firmalar mamlakatdagi energetika loyihalariga qiziqish bildirgan.

Avvalroq O‘zbekistonda besh oyda umumiy quvvati 1 254 megavatt bo‘lgan 6 ta yangi elektr stansiya ishga tushirilgani haqida xabar berilgandi.