Россия санкциялари Ўзбекистон энергетикасига қандай таъсир қилмоқда?

Россияга қарши санкциялар Ўзбекистондаги қайта тикланадиган энергия бўйича лойиҳаларини кечиктириб, логистика таъминот занжирларига таъсир қилмоқда. Бу ҳақда «Дарё»га Energy Intelligence’дан маълум бўлди.

Энергетика соҳасидаги узилган логистика занжирлари ҳамда юк ташиш ва суғурта билан боғлиқ муаммолар Ўзбекистонда табиий газда ишлайдиган CCGT заводи қурилиши учун газ турбиналарини ўтказишни кечиктирди, — дейди Ўзбекистон энергетика вазирлигидан Баҳром Умарбеков.

Турбиналар Қора денгиздаги Азов портидан Россия дарёлари орқали Қозоғистоннинг Ақтау портига, сўнгра Ўзбекистонга етказилиши ёки муқобил равишда Санкт-Петербург порти орқали жўнатилиши керак эди.

Аммо суғурта, санкциялар ва юк ташиш билан боғлиқ муаммолар туфайли етказиб бериш нархи кескин ошди, жўнатмалар эса кечиктирилди.

Санкциялар айрим операцияларга таъсир қилди», — дея тан олди «Ўзбекнефтегаз» давлат акциядорлик жамияти бошқаруви раисининг биринчи ўринбосари.

Унга кўра, шунга қарамай мамлакатнинг энергетика бўйича режалари ўзгаришсиз қолади, чунки Ўзбекистонда ҳам техника, ҳам технология етказиб бера оладиган кўплаб глобал ҳамкорлар мавжуд.

Ўзбекистоннинг ўтиш даври мақсадлари

Ўзбекистонда 2050 йилгача углерод нейтраллигига эришиш бўйича режалар мавжуд.

Мамлакат 2030 йилга бориб 7 гигаватт қуёш ва 5 ГВт шамол энергиясини ишлаб чиқаришни ўз олдига мақсад қилиб қўйган. Ўшандан бери арзон нархларни ҳисобга олган ҳолда минтақада водородни ўзлаштириш масаласини кўриб чиқа бошлади.

Хориж билан ҳамкорлик Ўзбекистонга ўз мақсадларига эришишда муҳим аҳамиятга эга. Масалан, 1 мегаватт қувватга эга қуёш станцияси 700 минг долларга тушиши мумкин, демак, 100 МВт қувватга эга станция 70 млн долларга тушади, — дея тушунтирди Умарбеков.

Ҳозирда инвестициялар давлат-хусусий шериклик асосида амалга оширилмоқда. Бу эса давлат бюджетига қўшимча босим ўтказяпти, шу боис бу юкни хусусий инвесторлар зиммасига юклаш режалаштирилмоқда.

Сўнгги йилларда Яқин Шарқдаги компаниялар, жумладан БАА ва Саудия Арабистонида жойлашган Masdar, Acwa Power ва БАА суверен бойлик фонди Mubadala каби фирмалар мамлакатдаги энергетика лойиҳаларига қизиқиш билдирган.

Аввалроқ Ўзбекистонда беш ойда умумий қуввати 1 254 мегаватт бўлган 6 та янги электр станция ишга туширилгани ҳақида хабар берилганди.