Moldova prokuraturasi sobiq prezident Igor Dodon va uning oilasiga tegishli mulkni xatladi, deb yozadi “Interfaks”. Bu haqda uning o‘zi prokuratura binosi yonida jurnalistlarga ma’lum qilgan.
Dodon Aksilkorrupsiya prokuraturasiga uni Mulki xatlangani haqida xabardor qilish uchun chaqirishganini aytdi.
“Tafsilotlarni ayta olmayman. Sizlarga bu haqda hech narsa aytmaslik haqidagi hujjatga imzo qo‘ydim. Bularning hammasi shou, ular bundan serial yasab, har kuni Dodon ishi haqida teleko‘rsatuv qilmoqchi”, — dedi siyosatchi.
Uning fikricha, “jinoyat ishi qalbakilashtirilgan, ularda yetarli va ishonchli dalillar yo‘q”. “Ular [prokurorlar] ishga omma e’tiborini tortib, fuqarolarni buzib ko‘rsatilgan raqamlar va detallar bilan hayratda qoldirmoqchi. Siyosiy tobe bo‘lgan prokurorlar agar menga qarshi qo‘zg‘atilgan jinoiy ish yuridik muvaffaqiyatga ega bo‘lmasa, u holda propagandachilik o‘yinlari bilan shug‘ullanish kerakligini tushundi. Bu propagandachilik spektaklining unsurlaridan biri — bir qator mulk obyektlarini xatlash, shu jumladan, menga tegishli bo‘lmagan yoki banklarda garovda bo‘lgan aktivlarni ham”, — dedi Dodon.
“Dushanba kuni hukumat va prokuratura birgalikda rejissorlik qilgan shou haqida qo‘shimcha ma’lumotlar taqdim etaman”, — deb va’da berdi sobiq prezident.
May oxirida Kishinyov sudi Moldova sobiq prezidenti Igor Dodonni 30 kunga uy qamog‘iga hukm qilgandi. U vatanga xiyonat, korrupsiya, noqonuniy boyish va siyosiy partiyaning jinoiy tashkilot tomonidan moliyalashtirilishida ayblanmoqda. Iyun oxirrog‘ida sud sobiq prezidentga nisbatan chiqarilgan uy qamog‘i tartibini yana 30 sutkaga uzaytirdi.
Dodon jurnalistlarga ish prezident Mayya Sanduning buyurtmasiga ko‘ra qo‘zg‘atilganini, go‘yoki u saylanganidan keyin darhol Dodonni qamoqqa yuborishni talab qilganini aytdi. Ayni paytda uning ma’lum qilishicha, bo‘layotgan voqealar “muxolifatning ta’sirini kesish maqsadida Moldovadagi AQSH elchixonasi tomonidan boshqarilmoqda”.
Rossiyaparast siyosatchi deb hisoblaniladigan Igor Dodon 2020-yilda prezident lavozimiga saylana olmadi va Moldovaning Yevroittifoq bilan yaqinlashuvi tarafdori bo‘lgan Mayya Sanduga yutqazdi.
Dodonga qarshi ish uning 2019-yilda moldovalik nufuzli siyosatchi va mamlakatdagi eng boy biznesmen Vladimir Plaxotnyuk bilan uchrashuvi aks etgan videoyozuvlar bilan bog‘liq. Videotasvirlardan birida Plaxotnyukning qo‘lida noma’lum paketni ko‘rish mumkin, uni o‘sha paytda prezident bo‘lgan Dodon “Kostyaga berishni” so‘ragan. Paketda pul bo‘lgan, degan da’volar ham aytildi. Dodon paket bilan bog‘liq videoyozuvni Plaxotnyuk tomonidan provokatsiya deb atadi.
Izoh (0)