Turkmaniston tez orada Afg‘oniston aholisiga gumanitar yordam ko‘rsatadi. Bu haqda 23-iyun kuni Turkmaniston Tashqi ishlar vazirligi rahbari Rashida Meredov Afg‘onistonning Turkmanistondagi Muvaqqat ishlar vakili Muhammad Fazel Sobir bilan uchrashuvda ma’lum qildi, deb yozmoqda “Xronika Turkmenistana”.
“Turkmaniston Tashqi ishlar vazirligi rahbari Turkmaniston Afg‘onistonning Xost va Paktika viloyatlarida sodir bo‘lgan dahshatli zilzila haqidagi xabarni chuqur qayg‘u bilan qabul qilganini ta’kidlab, ushbu mamlakat xalqiga samimiy hamdardlik tuyg‘ularini izhor etdi”, — deyilgan Turkmaniston TIV bayonotida.
22-iyunga o‘tar kechasi Afg‘onistonning markaziy mintaqasida 6,1 magnitudali zilzila sodir bo‘ldi. Oqibatda 1,5 ming kishi halok bo‘ldi va 2 ming kishi jarohat oldi. Jabrlanganlar soni ortishi mumkin.
Aprel oyida Turkmaniston Ukrainaga ham gumanitar yordam yuborgan edi.
“Xronika Turkmenistana” qayd etishicha, 20-iyun kuni ertalab Turkmanistonning Bolqon viloyati janubida 4,6 magnitudali zilzila sodir bo‘lgan. Turkmaniston davlat axborot agentliklari mamlakatda sodir bo‘layotgan tabiiy ofatlar va ularning oqibatlari haqida xabar bermaydi. Shuningdek, mamlakat o‘z aholisiga yordam ham ko‘rsatmaydi, deyiladi gazeta xabarida.
Izoh (0)