Rossiyada bu yil prezident Vladimir Putin bilan “jonli muloqot” o‘tgan yillarga nisbatan kechroq bo‘lib o‘tadi. Bu haqda uning matbuot kotibi Dmitriy Peskov ma’lum qildi.
“Jonli muloqot — u albatta bo‘ladi. U haqda unutganimiz yo‘q, qaytaga hozir u talabgir”, — dedi Peskov.
Shu bilan birga, Kreml vakili ta’kidlashicha, “hozir prezidentning muhimroq tadbirlari juda ko‘p”. “Shuning uchun — sal keyinroq. Lekin albatta bo‘ladi”, — deya ishontirdi u.
Avvalroq Peskov jonli muloqot 15—18-iyun kunlari bo‘lib o‘tgan Peterburg xalqaro iqtisodiy forumidan keyin o‘tkazilishini aytgandi. Keyinroq esa u Putin bilan jonli muloqot iyunda bo‘lib o‘tishini istisno qildi.
“Jonli muloqot” 2001-yildan boshlab har yili o‘tkaziladi, u faqat 2004, 2012 va 2020-yillarda amalga oshmagan. Efirda fuqarolar Putinga o‘z savollarini beradi, u esa javob beradi. 2020-yilda pandemiya boshlangani sababli jonli muloqot bekor qilingan.
2021-yildagi muloqot 30-iyun kuni o‘tkazilgan. Dastur 3 soat-u 42 daqiqa davom etgan, davlat rahbariga 2,2 milliondan ortiq savollar yuborilgan, u 68 tasiga javob berishga ulgurgan.
O‘rtacha hisobda tadbir ikki soatdan to‘rt soatgacha davom etadi. “Jonli muloqot” 2011-yilda eng uzoq davom etgan bo‘lsa (4 soat-u 32 daqiqa), 2001-yilda eng qisqa bo‘lgan (2 soat-u 20 daqiqa).
Izoh (0)