Молдова прокуратураси собиқ президент Игорь Додон ва унинг оиласига тегишли мулкни хатлади, деб ёзади «Интерфакс». Бу ҳақда унинг ўзи прокуратура биноси ёнида журналистларга маълум қилган.
Додон Аксилкоррупция прокуратурасига уни Мулки хатлангани ҳақида хабардор қилиш учун чақиришганини айтди.
«Тафсилотларни айта олмайман. Сизларга бу ҳақда ҳеч нарса айтмаслик ҳақидаги ҳужжатга имзо қўйдим. Буларнинг ҳаммаси шоу, улар бундан сериал ясаб, ҳар куни Додон иши ҳақида телекўрсатув қилмоқчи», — деди сиёсатчи.
Унинг фикрича, «жиноят иши қалбакилаштирилган, уларда етарли ва ишончли далиллар йўқ». «Улар [прокурорлар] ишга омма эътиборини тортиб, фуқароларни бузиб кўрсатилган рақамлар ва деталлар билан ҳайратда қолдирмоқчи. Сиёсий тобе бўлган прокурорлар агар менга қарши қўзғатилган жиноий иш юридик муваффақиятга эга бўлмаса, у ҳолда пропагандачилик ўйинлари билан шуғулланиш кераклигини тушунди. Бу пропагандачилик спектаклининг унсурларидан бири — бир қатор мулк объектларини хатлаш, шу жумладан, менга тегишли бўлмаган ёки банкларда гаровда бўлган активларни ҳам», — деди Додон.
«Душанба куни ҳукумат ва прокуратура биргаликда режиссёрлик қилган шоу ҳақида қўшимча маълумотлар тақдим этаман», — деб ваъда берди собиқ президент.
Май охирида Кишинёв суди Молдова собиқ президенти Игорь Додонни 30 кунга уй қамоғига ҳукм қилганди. У ватанга хиёнат, коррупция, ноқонуний бойиш ва сиёсий партиянинг жиноий ташкилот томонидан молиялаштирилишида айбланмоқда. Июнь охирроғида суд собиқ президентга нисбатан чиқарилган уй қамоғи тартибини яна 30 суткага узайтирди.
Додон журналистларга иш президент Майя Сандунинг буюртмасига кўра қўзғатилганини, гўёки у сайланганидан кейин дарҳол Додонни қамоққа юборишни талаб қилганини айтди. Айни пайтда унинг маълум қилишича, бўлаётган воқеалар «мухолифатнинг таъсирини кесиш мақсадида Молдовадаги АҚШ элчихонаси томонидан бошқарилмоқда».
Россияпараст сиёсатчи деб ҳисобланиладиган Игорь Додон 2020 йилда президент лавозимига сайлана олмади ва Молдованинг Евроиттифоқ билан яқинлашуви тарафдори бўлган Майя Сандуга ютқазди.
Додонга қарши иш унинг 2019 йилда молдовалик нуфузли сиёсатчи ва мамлакатдаги энг бой бизнесмен Владимир Плахотнюк билан учрашуви акс этган видеоёзувлар билан боғлиқ. Видеотасвирлардан бирида Плахотнюкнинг қўлида номаълум пакетни кўриш мумкин, уни ўша пайтда президент бўлган Додон «Костяга беришни» сўраган. Пакетда пул бўлган, деган даъволар ҳам айтилди. Додон пакет билан боғлиқ видеоёзувни Плахотнюк томонидан провокация деб атади.
Изоҳ (0)