G‘arb mamlakatlari Ukrainaga qurol yetkazib berishni to‘xtatgan taqdirda ham mamlakat harbiylari jang qilishda davom etadi, hatto belkuraklar yordamida kurashishga to‘g‘ri kelsa ham, dedi Ukraina tashqi ishlar vaziri Dmitriy Kuleba ARD telekanaliga bergan intervyusida.
“Agar bizda qurol bo‘lmasa ham mayli, u holda biz belkuraklar bilan jang qilamiz, ammo o‘zimizni himoya qilishda davom etamiz”, — deya ta’kidladi u.
Kuleba aniqlik kiritishicha, Ukraina harbiylari uchun qurol-yarog‘ qanchalik erta yuborilsa, bu mamlakatga shunchalik katta yordam bo‘ladi. “Agar qurol kechroq yuborilsa ham, baribir ‘rahmat’ deymiz, lekin u holda ko‘p narsa bekorga sarflangan bo‘ladi, ko‘p odamlar halok bo‘ladi”, — qo‘shimcha qildi u.
Vazir alohida ta’kidlashicha, G‘arb Ukrainaga qurol yetkazib berilmasa, uning Rossiyaga yon berishi osonroq bo‘ladi, deb o‘ylamasligi kerak. Shu bilan birga, u Ukrainada Rossiyaga nisbatan ancha kam qurol-yarog‘ borligini qayd etdi.
Qurol-yarog‘ yetkazib berish hozir Ukraina va G‘arb mamlakatlari, xususan, Yevroittifoq davlatlari o‘rtasidagi munosabatlarda eng jiddiy masalalardan biri bo‘lib turibdi. Chunonchi, Kiyev, masalan, Germaniyani og‘ir qurol-yarog‘lar yetkazib bermayotgani uchun tanqid qildi. Berlin, o‘z navbatida, Ukrainani qurollar bilan, shu jumladan, zamonaviy gaubitsalar bilan ta’minlayotganini, ammo Ukrainaning barcha xohishlarini ham qondira olmasligini aytib javob qildi.
11-iyun kuni Ukrainaning Germaniyadagi elchisi Andrey Melnik Berlin yetkazib berishlar bo‘yicha o‘z va’dalarining bir qismini yoz oxirigacha bajarishini ma’lum qilgandi. Gap yettita o‘ziyurar gaubitsa (22-iyungacha yetkaziladi) va 30 ta “Gepard” o‘ziyurar zenit qurilmalari (15 tasi iyul oxirigacha, qolgan 15 tasi avgust oxirigacha yetkaziladi) haqida bormoqda.
Avvalroq Ukraina G‘arb mamlakatlaridan o‘zi so‘ragan harbiy yordamning 10 foizinigina qabul qilgani aytilgandi. “Ukraina qancha ko‘p sa’y-harakatlar qilmasin, armiyamiz qanchalik darajada professional bo‘lmasin, g‘arblik sheriklarimiz ko‘magisiz bu urushda g‘olib bo‘la olmaymiz… Ukraina so‘ragan, bizga kerak bo‘lgan narsalarning taxminan 10 foizini oldik”, — degan edi mamlakat mudofaa vaziri o‘rinbosari Anna Malyar.
Izoh (0)