Fransiya parlamentiga saylovlarda Makronning koalitsiyasi g‘olib bo‘ldi, biroq mutlaq ko‘pchilik o‘ringa erisha olmadi

Fransiya prezidenti Emmanuel Makronning “Birgalikda!” koalitsiyasi mamlakat parlamentining quyi palatasi — Milliy majlisga bo‘lib o‘tgan saylovlarning ikkinchi bosqichida g‘olib bo‘ldi, biroq mutlaq ko‘pchilik o‘rinni qo‘lga kirita olmadi. U 577 ta o‘rindan 245 tasini egalladi, ko‘pchilik o‘ringa ega bo‘lish uchun unga 40 dan ortiq joy yetmay qoldi, deb yozadi “RBK”.

Mamlakat Ichki ishlar vazirligi saylovning yakuniy natijalarini e’lon qildi:

• Makronning “Birgalikda!” koalitsiyasi — 245 ta o‘rin;
• Jan-Lyuk Melanshonning “Yangi xalq ekologik va ijtimoiy ittifoqi” (Nupes) — 131 ta o‘rin;
• Marin Le Penning “Milliy birlashuv”i — 89 ta o‘rin;
• Respublikachilar va ularning ittifoqdoshlari — 61 ta o‘rin;
• Qolganlar — 51 ta o‘rin.

Fransiya bosh vaziri Elizabet Born ovoz berish yakunlarini izohlar ekan, ularni misli ko‘rilmagan holat deb atadi. “Bu vaziyat mamlakatimiz uchun xavf bo‘lib hisoblanadi, chunki ham milliy, ham xalqaro darajada to‘qnashishimizga to‘g‘ri keladigan muammolarni keltirib chiqaradi”, — dedi u.

Shunga qaramay, u ovoz berish natijalarini hurmat qilish va “xulosalar chiqarish” zarurligini aytdi. Born siyosiy kuchlarni birlashishga hamda “Fransiyada barqarorlikni kafolatlash va zarur islohotlarni o‘tkazish” ustida ishlashga chaqirdi.

Islohotlar o‘tkazish uchun Makron o‘z koalitsiyasidan tashqaridagi deputatlardan ko‘mak olishiga to‘g‘ri keladi, biroq ba’zi partiyalar allaqachon davlat rahbariga yordam berishni istamasligini bildirgan. Masalan, respublikachilar vakillari Makronga nisbatan muxolifat yo‘nalishida munosabatni saqlab qolishini e’lon qildi.

Parlament saylovlarining birinchi bosqichida Makronning koalitsiyasi kichik farq bilan oldinga chiqib olishga muvaffaq bo‘lgandi: u ovozlarning 25,7 foizini, Melanshonning Nupes’i — 25,64 foizini, Le Penning “Milliy birlashuvi” esa 18,72 foizini qo‘lga kiritgandi.

Parlament saylovlari majoritar saylov tizimi bo‘yicha o‘tkaziladi. Birinchi turdayoq saylanish uchun nomzod saylovchilarning mutlaq ko‘pchilik ovozini olishi kerak. Agar hech kim bunday natija qayd etmasa, ikkinchi tur o‘tkaziladi, unda birinchi turda kamida 12,5 foiz ovoz olgan barcha nomzodlar qatnashadi.

Milliy majlis Fransiya parlamentining quyi palatasi hisoblanadi. U umumiy saylovda saylangan 577 nafar deputatdan iborat bo‘lib, besh yil vakolat muddatiga ega bo‘ladi.