Kolumbiyada prezident saylovlarining ikkinchi bosqichi bo‘lib o‘tdi, unda “Kolumbiya qodir” tarixiy pakti” so‘llar koalitsiyasidan nomzod Gustavo Petro g‘olib bo‘ldi, deb yozadi “RBK”.
Byulletenlarning 99,86 foizi hisoblab chiqilganidan keyin Petro 50,47 foiz, uning liberal raqibi (“Aksilkorrupsiyachi hukmdorlar ligasi” partiyasidan) Rodolfo Ernandes — 47,27 foiz ovoz olgani ma’lum bo‘ldi. Petroga Fransiya Markes vitse-prezident bo‘ldi, u inson huquqlari va atrof-muhit muhofazasi harakati vakilasidir.
Ovoz berishda saylovchilarning qariyb 58 foizi qatnashdi.
Ernandes saylovdagi mag‘lubiyatini tan olib ulgurdi. “Bugun ovoz bergan fuqarolarning aksariyati boshqa nomzodni sayladi. Oldin ham ko‘p marta aytganman, men natijani qabul qilaman, agar institutlarimiz pishiq bo‘lishini istasak, shunday qilishimiz kerak”, — dedi u. Nomzod o‘z tarafdorlariga minnatdorlik bildirdi va Petroga “unga ishonch bildirganlarning hafsalasini pir qilmaslik”ni tiladi.
Prezident saylovlarining birinchi bosqichi 29-may kuni bo‘lib o‘tgandi. Petro 40 foiz, Ernandes — 28 foiz, “Kolumbiya uchun jamoa” o‘nglar koalitsiyasi yetakchisi Federiko Gutyerres — 23 foiz ovoz to‘plagandi.
Amaldagi prezident Ivan Duke Petroni g‘alaba bilan tabrikladi.
Gustavo Petro 62 yoshda. Talabalik davrida u so‘l radikal partizanlarning “19-aprel harakati” a’zosi bo‘lgan, uning ko‘magida 1991-yilda Kolumbiya Vakillar palatasi (mamlakat parlamenti — Kongressning quyi palatasi) deputatiga aylangan. 1994—1998-yillarda Kolumbiyaning Belgiyadagi elchixonasida ishlagan, so‘ng yana Vakillar palatasi deputati bo‘lgan. 2006-yildan 2010-yilgacha Senat (parlament yuqori palatasi) deputati bo‘lgan.
2010-yilda birinchi marta prezidentlikka nomzodini qo‘ygan, biroq yetarlicha qo‘llab-quvvatlanmagan (ovozlarning 9 foizini olgan). Bir yildan keyin u mamlakat poytaxti — Bogota meriga aylangan. Ayni paytda Kolumbiya so‘l siyosiy kuchlari yetakchisi sifatida o‘z o‘rnini mustahkamlay boshlagan. 2018-yilda yana prezident saylovlarida qatnashdi, ikkinchi bosqichga chiqdi, biroq 54 foiz ovoz olgan konservator Dukega yutqazdi.
Petro amalga oshirishni rejalashtirayotgan siyosiy qarorlar orasida Kolumbiyada neft qazib chiqarishdan bosh tortish; sof energiya bilan ishlaydigan qishloq xo‘jalik biznesiga yuklamani kamaytirish maqsadida soliq islohoti o‘tkazish; xususiy pensiya fondlaridagi pullarning davlat tomonidan ishlatilishi va boshqalar bor.
Izoh (0)