Ғарб мамлакатлари Украинага қурол етказиб беришни тўхтатган тақдирда ҳам мамлакат ҳарбийлари жанг қилишда давом этади, ҳатто белкураклар ёрдамида курашишга тўғри келса ҳам, деди Украина ташқи ишлар вазири Дмитрий Кулеба АRD телеканалига берган интервьюсида.
«Агар бизда қурол бўлмаса ҳам майли, у ҳолда биз белкураклар билан жанг қиламиз, аммо ўзимизни ҳимоя қилишда давом этамиз», — дея таъкидлади у.
Кулеба аниқлик киритишича, Украина ҳарбийлари учун қурол-яроғ қанчалик эрта юборилса, бу мамлакатга шунчалик катта ёрдам бўлади. «Агар қурол кечроқ юборилса ҳам, барибир ‘раҳмат’ деймиз, лекин у ҳолда кўп нарса бекорга сарфланган бўлади, кўп одамлар ҳалок бўлади», — қўшимча қилди у.
Вазир алоҳида таъкидлашича, Ғарб Украинага қурол етказиб берилмаса, унинг Россияга ён бериши осонроқ бўлади, деб ўйламаслиги керак. Шу билан бирга, у Украинада Россияга нисбатан анча кам қурол-яроғ борлигини қайд этди.
Қурол-яроғ етказиб бериш ҳозир Украина ва Ғарб мамлакатлари, хусусан, Евроиттифоқ давлатлари ўртасидаги муносабатларда энг жиддий масалалардан бири бўлиб турибди. Чунончи, Киев, масалан, Германияни оғир қурол-яроғлар етказиб бермаётгани учун танқид қилди. Берлин, ўз навбатида, Украинани қуроллар билан, шу жумладан, замонавий гаубицалар билан таъминлаётганини, аммо Украинанинг барча хоҳишларини ҳам қондира олмаслигини айтиб жавоб қилди.
11 июнь куни Украинанинг Германиядаги элчиси Андрей Мельник Берлин етказиб беришлар бўйича ўз ваъдаларининг бир қисмини ёз охиригача бажаришини маълум қилганди. Гап еттита ўзиюрар гаубица (22 июнгача етказилади) ва 30 та «Гепард» ўзиюрар зенит қурилмалари (15 таси июль охиригача, қолган 15 таси август охиригача етказилади) ҳақида бормоқда.
Аввалроқ Украина Ғарб мамлакатларидан ўзи сўраган ҳарбий ёрдамнинг 10 фоизинигина қабул қилгани айтилганди. «Украина қанча кўп саъй-ҳаракатлар қилмасин, армиямиз қанчалик даражада профессионал бўлмасин, ғарблик шерикларимиз кўмагисиз бу урушда ғолиб бўла олмаймиз… Украина сўраган, бизга керак бўлган нарсаларнинг тахминан 10 фоизини олдик», — деган эди мамлакат мудофаа вазири ўринбосари Анна Маляр.
Изоҳ (0)