Germaniya kansleri Olaf Shols yangi mamlakatlarning Yevropa Ittifoqiga kirish jarayonini soddalashtirishni taklif qildi. Bu haqda u DPA nashri bilan suhbatda aytgan.
Buning uchun Bryussel “o‘z strukturalari va qaror qabul qilish jarayonlarini modernizatsiya qilishi zarur”, — dedi u.
Shols 23—24-iyun kunlari bo‘lib o‘tadigan YI sammitida bu masalani ko‘tarish niyatida. O‘sha yig‘ilishda Yevropa Ittifoqi yetakchilari Ukraina, Moldova va Gruziyaga a’zolikka nomzod maqomini berish masalasini ko‘rib chiqadi.
Hozir Yevropa Ittifoqiga a’zo bo‘lish uchun ariza topshirgan davlatlar ushbu maqomni faqat barcha a’zo davlatlarning bir ovozdan qabul qilgan qarori bilan olishi mumkin. Biroq kansler yakdillik tamoyilini shubha ostiga qo‘ymoqda.
Shols Bryusselni Ukrainaning maqomi borasida “birlik ruhida” qaror qabul qilishga chaqirdi. Uning qayd etishicha, jarayon murakkab bo‘ladi: Yevropa Ittifoqiga a’zo bo‘lishni xohlovchi har bir nomzod davlat “ko‘plab talablarni” bajarishi kerak.
Kansler, shuningdek, sammit YIga kirishni kutayotgan Bolqon davlatlariga turtki berishiga umid qilmoqda. “Biz G‘arbiy Bolqon mamlakatlariga jiddiy kayfiyatda ekanimizni ko‘rsatishimiz kerak. Albaniya va Shimoliy Makedoniya Yevropa Ittifoqiga a’zo bo‘lish bo‘yicha aniq muzokaralarni boshlash uchun barcha talablarga javob beradi”, — dedi u va bu muzokaralar “hoziroq boshlanishi kerakligini” qo‘shimcha qildi.
17-iyun kuni Yevropa Komissiyasi Ukraina va Moldovaga YIga nomzod maqomini berishni tavsiya qildi. Gruziya hozircha rad etilgan — Yevropa komissiyasi prezidenti Ursula fon der Lyayenning so‘zlariga ko‘ra, mamlakat “hozir YI yo‘nalishidagi tarkibiy islohotlar bo‘yicha umumiy yo‘nalishni aniqlash uchun siyosiy jihatdan birlashishi kerak”.
Ukraina va Moldova ham islohotlar o‘tkazishi zarur. Shu bilan birga, Yevrokomissiya “ukrainaliklar Yevropa istiqboli uchun jon berishga tayyor”, deya tan oldi. Kiyev bajarishi kerak bo‘lgan shartlar qatorida yuqori darajadagi korrupsiya va oligarxlarga qarshi kurashni kuchaytirish, shuningdek, ozchiliklarga oid qonunchilikni isloh qilish ham bor.
Hozirda YIga nomzodlar —Turkiya (1999), Shimoliy Makedoniya (2005), Serbiya (2012), Chernogoriya (2012) va Albaniya (2014) hisoblanadi. Ukraina prezidenti Vladimir Zelenskiy Ukraina, Albaniya, Chernogoriya va Shimoliy Makedoniya o‘zaro raqib emasligini va ular Yevropa Ittifoqining to‘liq a’zosi bo‘lishi kerakligini aytgandi.
Izoh (0)