O‘zbekistonlik haydovchilar ilk marotaba Afg‘oniston orqali Pokistonga yuk tashuvlarini amalga oshirdi. Bu haqda Transport vazirligi xabar berdi.
Ma’lum qilinishicha, Toshkent—Termiz—Mozori Sharif—Qobul—Peshovar—Karachi yo‘nalishi bo‘ylab 2760 kilometr yo‘lni bosib o‘tgan o‘zbekistonlik haydovchilar Karachi portidan ortilgan yukni (muzlatilgan go‘sht) bir haftada Toshkentga yetkazib kelgan.
26—27-mart kunlari Termiz shahrida O‘zbekiston, Afg‘oniston va Pokistonning yirik transport-logistika kompaniyalari, Xalqaro avtomobil tashuvchilari uyushmasi hamda transport va bojxona idoralari vakillari ishtirokida transport masalalari bo‘yicha uch tomonlama ishchi guruhining uchrashuvi tashkil etilgandi.
Uchrashuvda O‘zbekiston, Afg‘oniston va Pokiston davlatlari hududi bo‘ylab avtomobil transportida xalqaro yuk tashuvlari jarayonida yuzaga kelayotgan muammolar va ularni hal etish masalalari yuzasidan aniq chora-tadbirlar rejasi belgilab olingan edi.
“Uch tomonlama sa’y-harakatlar natijasida bugun ushbu transport koridorining to‘laqonli faoliyat yuritishi, yuklarning qisqa fursatlarda, xavfsiz ravishda belgilangan manziliga yetkazilishi ta’minlanmoqda”, — deyiladi xabarda.
Eslatib o‘tamiz, 2021-yilning noyabr oyida Pokiston O‘zbekiston tranziti uchun bojxona rasmiylashtiruvini soddalashtirgan edi — yuk mashinalari kirish to‘lovi bo‘yicha depozit to‘lamasdan mamlakatga kirishi mumkin. 2022-yilning mart oyida esa Hindiston ilk bor O‘zbekistonga tijorat yukini Pokiston va Afg‘oniston orqali tranzit qilib jo‘natgan edi. Undan oldin esa Pokiston O‘zbekistonga mol go‘shti yetkazib berishni boshlagandi. Iyun boshida O‘zbekiston Hindistonga Pokistonning Karachi porti orqali birinchi yukni jo‘natgan edi.
Izoh (0)