Qashqadaryo viloyatining Ko‘kdala tumanida mast erkak otasi va farzandiga pichoq bilan tan jarohati yetkazdi. Bu haqda viloyat IIB axborot xizmati xabar berdi.
Ma’lum qilinishicha, 13-iyun kuni ertalab 06:00 larda tumanning “Baxt” MFYda yashovchi fuqaro P.J. mast holatda o‘zining yashash uyida janjal ko‘tarib, otasi S.M. va farzandiga pichoq bilan tashlangan hamda ularga tan jarohati yetkazgan. Shundan so‘ng P.J. otasini amakisining uyiga qadar quvib borib, u bilan yana janjallashmoqchi bo‘lganida amakisining farzandlari uni to‘xtatib qolgan.
Jinoyatning sabablari tahlil qilinganda 32 yoshli erkakning bekorchilikdan muntazam spirtli ichimlik iste’mol qilishga mukkasidan ketgani aniqlangan. “Bunday vaziyatda otaning bosiqlik, vazminlik bilan ish ko‘rmagani ta’kidlandi. Oqibatda ertalabdan ota-bolaning tortishuvi yuzaga kelgan. Natija esa ayanchli yakun topgan”, — deyiladi xabarda.
Holat yuzasidan Ko‘kdala tumani prokuraturasi tomonidan P.J.ga nisbatan Jinoyat kodeksining 25, 97-moddasi (qasddan odam o‘ldirish) 2-qismi “a,v” bandlari bilan jinoyat ishi qo‘zg‘atilib, Jinoyat-protsessual kodeksining 221-moddasi tartibida ushlanib, qamoqqa olish tarzidagi ehtiyot chorasi qo‘llangan.
Avvalroq Shahrisabz shahridagi to‘yxonada erkak bir necha kishi tomonidan pichoqlangani, Samarqandda o‘g‘il o‘z otasi va akasini bolta bilan chopib tashlagani, Farg‘onada fuqaro ikki tanishini pichoqlagani to‘g‘risida xabar berilgandi.
Izoh (0)