Ўзбекистонлик ҳайдовчилар илк маротаба Афғонистон орқали Покистонга юк ташувларини амалга оширди. Бу ҳақда Транспорт вазирлиги хабар берди.
Маълум қилинишича, Тошкент—Термиз—Мозори Шариф—Қобул—Пешовар—Карачи йўналиши бўйлаб 2760 километр йўлни босиб ўтган ўзбекистонлик ҳайдовчилар Карачи портидан ортилган юкни (музлатилган гўшт) бир ҳафтада Тошкентга етказиб келган.
26—27 март кунлари Термиз шаҳрида Ўзбекистон, Афғонистон ва Покистоннинг йирик транспорт-логистика компаниялари, Халқаро автомобиль ташувчилари уюшмаси ҳамда транспорт ва божхона идоралари вакиллари иштирокида транспорт масалалари бўйича уч томонлама ишчи гуруҳининг учрашуви ташкил этилганди.
Учрашувда Ўзбекистон, Афғонистон ва Покистон давлатлари ҳудуди бўйлаб автомобиль транспортида халқаро юк ташувлари жараёнида юзага келаётган муаммолар ва уларни ҳал этиш масалалари юзасидан аниқ чора-тадбирлар режаси белгилаб олинган эди.
«Уч томонлама саъй-ҳаракатлар натижасида бугун ушбу транспорт коридорининг тўлақонли фаолият юритиши, юкларнинг қисқа фурсатларда, хавфсиз равишда белгиланган манзилига етказилиши таъминланмоқда», — дейилади хабарда.
Эслатиб ўтамиз, 2021 йилнинг ноябрь ойида Покистон Ўзбекистон транзити учун божхона расмийлаштирувини соддалаштирган эди — юк машиналари кириш тўлови бўйича депозит тўламасдан мамлакатга кириши мумкин. 2022 йилнинг март ойида эса Ҳиндистон илк бор Ўзбекистонга тижорат юкини Покистон ва Афғонистон орқали транзит қилиб жўнатган эди. Ундан олдин эса Покистон Ўзбекистонга мол гўшти етказиб беришни бошлаганди. Июнь бошида Ўзбекистон Ҳиндистонга Покистоннинг Карачи порти орқали биринчи юкни жўнатган эди.
Изоҳ (0)