“O‘zbekneftgaz” AJda xalqaro ekspertlarni jalb qilgan holda ESG standartlarini joriy etish bo‘yicha tizimli ishlar olib borilmoqda.
Shu jumladan, bugungi kunda:
- Xalqaro konsultantlar (BCG va PwC) tomonidan kompaniyaning ESG profili diagnostika qilindi va takomillashtirish bo‘yicha tavsiyalar ishlab chiqildi;
- ESG mas’uliyat markazi — ESG standartlarini joriy qilishni muvofiqlashtirish va tashkiliy masalalar bo‘yicha mas’ul qo‘mita tashkil qilindi;
- ESG’ni joriy etish bo‘limi, “O‘zbekneftgaz” AJ boshqaruv raisi Mehriddin Abdullayevning transformatsiya masalalari bo‘yicha birinchi o‘rinbosariga to‘g‘ridan to‘g‘ri bo‘ysunuvchi, ESG standartlarini joriy etish uchun bevosita mas’ul tarkibiy bo‘linma tashlik qilindi;
- Kompaniyaning ESG maqsadlari va ularning ko‘rsatkichlari loyihasi ishlab chiqildi.
Ishlab chiqarish korxonalari rahbariyatini ESG’ning dolzarb masalalari bilan yaqindan tanishtirish maqsadida, joriy yilning 15—16-iyun kunlari qazib chiqarish boshqarmalari va gazni qayta ishlash zavodlarida, xususan, Muborak tumani va Qarshi shahrida boshqaruv raisining maslahatchisi (A. Mustafayev) va ESG’ni joriy etish bo‘limi boshlig‘i (M. Nigmadjanov) ishtirokida ochiq o‘quv seminarlari o‘tkazildi.
Seminar davomida ishtirokchilar quyidagilar bilan yaqindan tanishdi:
- ESG bilan bog‘liq asosiy tushunchalar;
- Ushbu standartlar kelib chiqishining tarixiy jihatlari;
- BMTning barqaror rivojlanish maqsadlari (UN SDG);
- O‘zbekiston Respublikasida ESG sohasida qabul qilingan normativ-huquqiy hujjatlar;
- BCG, EY va McKinsey kabi xalqaro maslahatchilar tomonidan olib borilgan tadqiqotlar natijalari.
Muborak gazni qayta ishlash zavodi va Muborak neft va gaz qazib chiqarish boshqarmasi rahbarlari uchun seminar bo‘lib o‘tdi. Zavod direktori Shamsiyev Shermat Jo‘raqulovich ushbu mavzuga o‘z qiziqishini bildirdi va ESG standartlarini joriy qilish jarayonida puxta rejalashtirilgan harakatlar muhimligini ta’kidlab o‘tdi.
“O‘zbekneftgaz” AJning Qarshi shahridagi ma’muriy binosida Sho‘rtan gaz kimyo majmuasi va Sho‘rtan neft va gaz qazib chiqarish boshqarmasi, “O‘zneftgazburg‘ilash ishlari” MChJ rahbariyati uchun seminar tashkil qilindi. Seminarlar davomida kompaniya ESG maqsadlari loyihasi ham muhokama qilinib, tadbir ishtirokchilaridan bu boradagi rejalarni amalga oshirish uchun takliflar olindi.
“O‘zbekneftgaz” AJning 2021-yil uchun ESG hisobotini tuzish va ESG reytingini olishda qo‘llab-quvvatlash bo‘yicha xalqaro konsalting kompaniyasini jalb qilishi bo‘yicha ishlar olib borilayotgani ham alohida ta’kidlab o‘tildi.
Kelgusida ham “O‘zbekneftgaz” AJ xodimlarining ESG va barqaror rivojlanish masalalari bo‘yicha bilim va ko‘nikmalarini oshirishga qaratilgan tadbirlar tasdiqlangan rejalarga muvofiq davom ettiriladi.
“O‘zbekneftgaz” AJ matbuot xizmati
Izoh (0)