Samarqandda 16 yoshli yigit kanalga cho‘kib ketdi. Uning murdasi sakkiz kundan keyin topilgan

Samarqand viloyati Urgut tumanida 16 yoshli o‘smir kanalga cho‘kib ketdi. Bu haqda viloyat prokuraturasi xabar berdi.

Ma’lum qilinishicha, 8-iyun kuni soat 12:00 larda “Rahmatobod” mahallasi hududidan oqib o‘tuvchi Zarafshon daryosining chap qirg‘oq kanaliga shu mahallada yashovchi 16 yoshli F.M. o‘z ehtiyotsizligi oqibatida tushib ketib, cho‘kib ketgan.

Mazkur holat yuzasidan olib borilgan tergovga qadar tekshirish jarayonida mahallaning 65 nafar fuqarosi, tuman IIB xodimlari hamda tuman FVB mutaxassislari ishtirokida F.M. suvga tushib cho‘kib ketgan joylar ko‘zdan kechirilgan. 16-iyun kuni soat 13:30 larda “Boybul” mahallasi hududidan o‘tgan Jartepa va Panjikent yo‘nalishini kesib o‘tuvchi Yangi Darg‘om kanalining o‘ng tomon qirg‘og‘idan yigitning murdasi tan jarohatlarisiz topilgan.

Ta’kidlanishicha, o‘lim sababini aniqlash uchun sud tibbiyot ekspertizasi tayinlangan, biroq marhumning ota-onasi va yaqin qarindoshlari holat yuzasidan biror-bir kishiga da’vo va e’tirozlari yo‘qligini hamda ekspertizadan o‘tkazishga norozi ekanini bildirgan.

“Voyaga yetmagan F.M. o‘zining ehtiyotsizligi oqibatida suvga tushib, cho‘kib vafot etishi holatida biror-bir shaxsning harakati yoki harakatsizligida jinoyat tarkibi bo‘lmagani sababli Urgut tuman prokuraturasi tomonidan jinoyat ishi qo‘zg‘atishni rad etish haqida qaror qabul qilindi”, — deyiladi xabarda.

Avvalroq Qashqadaryoda 25 yoshli yigit suv omboriga cho‘kib ketgani, farg‘onalik ayol ikki nafar farzandi bilan Katta Farg‘ona kanaliga cho‘kib ketgani, Qashqadaryoda 17 yoshli futbolchi cho‘kib ketib, vafot etgani to‘g‘risida xabar berilgandi.