O‘zbekistonda sport sohasida aniqlangan qonun buzilishlar muhokama qilindi, deb xabar beradi Bosh prokuratura.
Sport, madaniyat, madaniy meros va turizm sohalarida qonunchilik ijrosi ustidan nazorat boshqarmasi va uning quyi tarmoqlari tomonidan “Sport-ta’lim muassasalari faoliyatini 2025-yilgacha rivojlantirish dasturi to‘g‘risida”gi va “2024-yil Parij shahrida (Fransiya) bo‘lib o‘tadigan XXXIII yozgi Olimpiya va XVII Paralimpiya o‘yinlariga O‘zbekiston sportchilarini kompleks tayyorlash to‘g‘risida”gi qarorlari hamda sohaga oid boshqa normativ-huquqiy hujjatlar ijrosi davlat sport tashkilotlari va sport-ta’lim muassasalarida o‘rganilgan.
O‘rganish doirasida 127 ta tekshirish o‘tkazilib, 948 ta prokuror nazorati hujjatlari qo‘llanilgan va 356 nafar shaxsning buzilgan huquqlari tiklangan.
Shuningdek, 463 ta obyektlarda o‘rganishlar o‘tkazilib, 26,1 milliard so‘mlik yetkazilgan zarar aniqlangan. Tekshirish davomida 9,8 milliard so‘mlik zarar undirilib, qo‘pol qonun buzilishi holatlari yuzasidan 65 ta jinoyat ishlari qo‘zg‘atilgan.
Xususan, 2019-2021-yillarda:
- sport-ta’lim muassasalari ehtiyojlari uchun ajratilgan 19 ta holatda 6,4 milliard so‘m;
- sport muassasalarini qurish va ta’mirlash uchun 17 ta holatda 11,8 milliard so‘m;
- sport jihozlarini sotib olish uchun 6 ta holatda 2,7 milliard so‘m;
- o‘tkazilmagan o‘quv mashg‘ulot yig‘inlari uchun 5 ta holatda 1,4 milliard so‘m budjet mablag‘lari talon-toroj qilingani aniqlangan.
Avvalroq Qashqadaryoda bank xodimlari 150 nafar fuqaroning pensiya va nafaqa pullarini talon-toroj qilgani, Toshkentda sug‘urta polislaridan tushgan 725 mln so‘mni o‘zlashtirgan sug‘urta kompaniyasi sobiq direktori va agenti ushlangani, Toshkentda 32 ta uy-joy shirkati jami 3,5 mlrd so‘mni maqsadsiz sarflagan yoki talon-toroj qilgani to‘g‘risida xabar berilgandi.
Izoh (0)