Toshkent shahri Yunusobod tumanida elektr tarmoqlari korxonasining soxta xodimlari ushlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departament tomonidan IIV xodimlari bilan hamkorlikda tezkor tadbir o‘tkazilgan. Unda o‘zlarini Yunusobod tumani ETK xodimlari deb tanishtirgan M.Y. va D.K. Yunusobod tumani 4-mavze 54-uydagi xonadonning elektr hisoblagichi (tamg‘alari buzilmagan) noto‘g‘ri ulanganini ro‘kach qilgani aniqlangan. Ular shu bo‘yicha tarmoqdan uzish haqida tuzilgan dalolatnomani ro‘yxatdan o‘tkazmaslik evaziga xonadon egasi A.dan 200 dollarni olgan vaqtida ashyoviy dalillar bilan ushlangan.
Shuningdek, o‘tkazilgan tergovga qadar tekshiruvda Yunusobod tumani ETK “ASKUE” xodimi X.M. fuqaro M.Y.ga 22-sonli soxta guvohnomani yasab bergani aniqlangan.
Holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Mavzuga doir:
Izoh (0)