O‘zbekiston Mudofaa vazirligiga qarashli korxona 15,3 mlrd so‘mlik moliyaviy xato va kamchilikka yo‘l qo‘ygani aniqlandi

Mudofaa vazirligi huzuridagi “Harbiy Savdo-Chirchiq” DUKda 15,3 milliard so‘mlik moliyaviy xato va kamchiliklarga yo‘l qo‘yilgani aniqlandi. Bu haqda Korrupsiyaga qarshi kurashish agentligi matbuot xizmati ma’lum qildi.

Ma’lum qilinishicha, Korrupsiyaga qarshi kurashish agentligiga “Harbiy Savdo-Chirchiq” DUK mansabdorlarining noqonuniy xatti-harakatlari, jumladan, juda ko‘p miqdordagi mulklarni talon-toroj qilish, o‘z mansab va xizmat mavqeyidan qonunga xilof ravishda foydalanib, pul mablag‘larini o‘zlashtirish, “Davlat xaridlari to‘g‘risida”gi qonun hujjatlarini buzish va boshqa turdagi iqtisodiy jinoyatlar sodir etib kelinayotgani bo‘yicha fuqarolardan kelib tushgan murojaat asosida mazkur korxonada o‘rganish o‘tkazilgan.

O‘rganish davomida korxona moddiy javobgar shaxslari tomonidan mehnat munosabatlari, davlat xaridlari tartibini belgilovchi hamda boshqa qonun hujjatlarining buzilishi natijasida korxona faoliyatida jami 15,3 milliard so‘mlik moliyaviy xato va kamchiliklarga yo‘l qo‘yilgani aniqlangan.

O‘rganish yakunlari bo‘yicha to‘plangan hujjatlar Jinoyat-protsessual kodeksining 329-330-moddalariga asosan qonuniy qaror qabul qilish uchun 2022-yil 24-fevral kuni Bosh prokuraturaga yuborilgan.

Holat yuzasidan O‘zbekiston Harbiy prokuraturasi tomonidan tergovga qadar tekshiruv harakatlari o‘tkazilib, 2022-yil 12-mart kuni “Harbiy Savdo-Chirchiq” DUK moddiy javobgar shaxslariga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 2-qismi “g” bandi bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.

Bundan oldin Bandlik vazirligi jamg‘armasiga noto‘g‘ri va ortiqcha sarflangan salkam 407 mln so‘m mablag‘ qaytarilgani, Xalq ta’limi tizimida 27,5 mlrd so‘mlik o‘g‘irlik va kamomad aniqlangani to‘g‘risida xabar berilgandi.